Австрискиот политичар Кристијан Шлихер од Партијата на слободата поднесе оставка денес под притисок од јавноста кога неговата антимигрантска песна предизвика жестока реакција во Австрија и пошироко.

Ова беше потврдено од страна на заменик-канцеларот Хајнц-Кристијан Штрахе, партиски колега на Шлихер, кој рече дека тој ќе ја напушти партијата ФПО.

Шлихер поднесе оставка како заменик-градоначалник на Браунау на Ина, инаку родното место на Адолф Хитлер.

Во песната Шлихер ги споредува мигрантите со стаорци и предупредува на опасноста од мешање на културите, објавија австриските медиуми.

Остро реагира и канцеларот Себастијан Курц, кој е во коалиција со Партијата на слободата од 2017 година и побара нејзиниот разгранок во Горна Австрија да се дистанцира од песната.

„Изборот на зборови е одвратен, нечовечен и длабоко расистички“, рече тој.

Полицијата од Северна Ирска денеска објави дека уапсила 57-годишна жена врз основа на антитерористичкиот акт во врска со убиството на новинарката Лира Мекки.

Апсењето на жената се случи по соопштението на организацијата „Нова ИРА“, во кое признава дека еден од нејзините доброволци ја убил новинарката Меки, која била погодена од огнено оружје додека известувала за немирите во Лондондери, објави АП.

Властите веруваат дека едно лице пукало за време на хаотичните немири што избија во четвртокот вечерта, но ја имаше поддршката од својата организација.

Лира Меки беше убиена минатата недела кога заталкан куршум ја погоди во главата кога непознати луѓе пукаа и фрлаа „молотови коктели“ на полицајците за време на рутинска контрола во округот Креган во Лондондери.

Италијанскиот министер за внатрешни работи и лидер на десничарската лига, Матео Салвини, денеска изјави дека владејачката коалиција пред себе има уште четири години работа и дека треба да се избегнат вонредни избори.

„Можам да ви кажам дека сум посветен на опстанокот на владата, но за танго се потребни двајца“, рече Салвини.

Двете водечки партии во коалицијата се судрија минатата недела кога почна истрага за економскиот советник на Салвини, Армандо Сири, според „Блумберг“.

Според агенцијата, водачот на Движењето Пет ѕвезди и вицепремиер Луиџи ди Мајо тогаш побарал оставка од Сири.

Десничарската партија Лига, сепак, го поддржа Сири нагласувајќи дека има голема доверба ​​во него.

Салвини изрази уверување дека владата ќе преживее и дека има знаци на закрепнување во италијанската економија.

Според анкетата за јавното мислење, десничарската Лига има 36,9 отсто поддршка од граѓаните, што е речиси 15 отсто повеќе од Движењето Пет ѕвезди.