САД, Велика Британија, Саудиска Арабија и Обединетите Арапски Емирати се заложија за дипломатско решение на кризата со Иран.

„Го повикуваме Иран да ги прекине сите активности кои би можеле да ја загрозат регионалната стабилност и ги повикуваме на дипломатско решение за да се смири напнатоста“, се наведува во заедничкото соопштение на овие земји.

Четирите земји истовремено изразија загриженост поради нападот на бунтовниците од Јемен на саудискиот аеродром каде во неделата загина едно лице.

Руската војска почна голема воена вежба, која има за цел да ја провери подготвеноста на воружените сили да одговорат на евентуални безбедносни закани.

Податоците на Министерството за одбрана укажуваат дека на вежбите учествуваат 150.000 војници, 500 авиони и 20.000 возила.

Според зборовите на министерот за одбрана на Русија, Сергеј Шојгу, вежбите ќе ја проверат подготвеноста на војската да ја одржи безбедноста во централна Азија која, како што рече, се соочува со сериозни терористички закани, пренесе „АП“.

Шојгу наведе дека вежбата ќе биде одржана на 35 полигони.

Руските функционери се загрижени од можноста за ширење на екстремистите од Авганистан во поранешните советски републики во централна Азија.

Белгиската полиција уапси маж за кој се сомнева дека планирал да изврши терористички напад врз амбасадата на САД во Брисел, соопштија денеска обвинителите.

Мажот кој е идентификуван како М.Г. бил уапсен во саботата и е обвинет за тероризам, јави „Ројтерс“.

Тој ги негира обвинувањата.