Неколку илјади луѓе денеска излегоа на протест во Амстердам поради националната блокада воведена за забавување на ширењето на пандемијата на коронавирусот, пред полицијата да ги растера.

Демонстрантите се собраа држејќи натписи: „Слобода: Стоп за оваа опсада“ и извикувајќи „Што сакаме? Слобода!“.

Ниту еден од собраните не носеше маски, кои, сепак, не се задолжителни, а само некои од нив одржуваа физичка дистанца.

Властите не издадоа дозвола за одржување на протестот на плоштадот пред музејот „Ван Гог“.

Бидејќи демонстрантите одбија да се разотидат, полицијата користеше водени топови за да ги растера.

Холандската влада ги затвори училиштата и повеќето продавници во декември за да го намали ширењето на коронавирусот, а оваа недела го продолжи карантинот за уште три недели.

Шест лица се спасени, а четири загинаа кога украински товарен брод со 12 член екипаж потона денес крај брегот на турската црноморска провинција Бартин.

„Шест лица беа спасени од товарниот брод“, рече провинцискиот гувернер Синан Гунер, јави агенцијата Анадолија.

Бродот потонал поради лошите временски услови.

„Загинаа четири лица. Потрагата беше прекината поради големите бранови, но хеликоптери летаат над областа”, нагласи гувернерот.

Првичните информации беа дека бродот е руски, сепак, РИА Новости наведува дека станува збор за брод што пловел под знамето на државата Палау, а е во сопственост на украинска компанија и бил отстранет од рускиот регистар во 1997 година.

Министерството за надворешни работи на Украина потврди дека на бродот имало 10 украински државјани, како и двајца Руси.

Полицијата приведе маж во Капитол Хил кој со пиштол и муниција се обидел да помине преку контролен пункт со лажни документи, јави Си-Ен-Ен.

Според телевизиските извори, уапсениот се обидел со автомобил да влезе во ограничена област недалеку од зградата на Конгресот на САД.

Човекот имал пиштол во неговиот автомобил. Покрај тоа, биле пронајдени околу 500 парчиња муниција, вклучително и ловџиска пушка. Мажот бил приведен и обвинет за нелегално поседување оружје, додаде телевизијата.

Безбедносните мерки во Вашингтон се засилени пред инаугурацијата на новоизбраниот претседател Џо Бајден на 20 јануари. Голем дел од центарот на градот е затворен за сообраќај