Делта варијантата на коронавирусот, првпат откриена во Индија, значително ќе се прошири низ Европа во текот на летото, предупреди Европската здравствена агенција.

Делта варијантата е 40-60 проценти позаразна од алфа варијантата на вирусот, откриена за прв пат во Англија, објави Европскиот центар за превенција и контрола на болести (ЕЦДЦ) .

Европската агенција со седиште во Стокхолм очекува дека 70 проценти од новозаразените случаи во Европа ќе бидат поврзани со делта на почетокот на август.

До крајот на тој месец, процентот ќе биде 90 проценти, пренесува Ројтерс.

„Многу е веројатно дека варијантата делта ќе се прошири во текот на летото, особено кај помладата популација која не е приоритетна за вакцинација“, рече директорот на агенцијата, Андреа Амон.

„Ова може да претставува ризик за ранливите лица кои би можеле да се заразат и да доживеат тешка болест и смрт доколку не бидат целосно вакцинирани“, додаде таа во изјавата.

Научниците од Оксфорд ја анализирале стапката на реинфекција со оваа варијанта кај луѓето кои го прележале Ковид-19, а резултатите беа објавени минатата недела.

Инциденцата беше особено висока кај лица кои биле заразени со бета и гама варијанти, кои потекнуваат од Јужна Африка, односно Бразил.

Но, истражувањето на Оксфорд исто така покажа дека вакцините „Фајзер“ и „Астразенека“ се ефикасни против делта варијантата и обезбедуваат висока 90-процентна заштита од хоспитализација, пренесува Ројтерс.

Ние не сме тие кои не успеавме, туку ЕУ која повторно потфрли и не го одржа ветувањето, изјави премиерот на Албанија, Еди Рама, на панел на првиот Економски форум во Скопје на кој учествува и премиерот Зоран Заев.

Коментирајќи го неуспехот на ЕУ да испорача преговори за Скопје и Тирана поради бугарското вето, Рама изјави дека што и да се случува во Брисел, мора да продолжи порастот на економијата, зголемувањето на благосостојбата, но и гордоста и силата на достоинството на народите во регионот.

„Европската унија може да одреди задачи за интеграцијата, може да одреди рокови за овие задачи, може да одреди датуми. Но, ЕУ не може да ја одреди ниту нашата местоположба среде Европа, ниту нашата култура и нашиот европски идентитет, ниту иднината на нашите народи како европски народи во европското семејство, во европски држави, со политички, институционални, економски европски стандарди“, изјави Рама.

Рече дека вчера во Брисел не се случило ништо друго, освен тоа што ЕУ потфрлила повторно да го одржи ветувањето, да остане посветена на аганжманот и да биде на вистинскиот став.

Нагласи дека регионалната соработка ќе продолжи со сите сили и со сите држави од Западен Балкан кои се подготвени да се туркаат напред безрезервно, затоа што овој регион е опкружен со границите на ЕУ и, ако ние не можеме да го смениме начинот на кој функционира ЕУ во однос кон нас, ние треба следствено да го менуваме начинот на нашето функционирање едни кон други.

„Топењето на границите меѓу нас е за да го претвори нашиот регион во простор на целосна имплементација на четирите слободи на ЕУ: слобода на движење на луѓе, слобода на движење на стоки, слобода на движење на услуги и капитал. Тоа ќе продолжи без да сопре, бидејќи ние сме премногу мали да имаме силни економии останувајќи одвоени едни од други, а инаку, ние сме доволно големи ако едни со други го претвориме регионот во еден заеднички економски простор“, додаде Рама.

Руски воен брод испукал предупредувачки истрели кон уништувач на британската кралска морнарица, ХМС Дифендер, откако влегол во руските води во Црното Море, објави во средата „Интерфакс“, пренесувајќи соопштение на руското Министерство за одбрана.

Инцидентот се случил во близина на југот на Крим, кој Русија го анектираше во 2014 година.

Би-би-си наведува дека руски патролен брод испукал два истрела кон британскиот уништувач, но Русите не застанале тука. Имено, паралелно со предупредувачките истрели од рускиот воен брод, руски борбен авион „су-24“ фрлил четири високо-експлозивни бомби во морето пред британскиот уништувач, соопшти руското министерство.

„ХМС Дифендер ги напушти руските води кратко потоа“, информираат од Министерството за одбрана на Русија.

„Уништувачот беше предупреден дека ќе се употреби оружје доколку ја премине границата на Руската Федерација. Тој не реагираше на предупредувањето“, се вели во соопштението.

Аташето за одбрана на британската амбасада бил повикан во руското Министерство за одбрана на разговор, го цитира министерството, „Интерфакс“.

ХМС Дифендер е уништувач тип 45 и извршува мисии во Црното Море, се наведува на веб-страницата на кралската морнарица.