Европската агенција за лекови (ЕМА) објави дека треба да се избегнува вакцината „Астразенека“  за лица над 60 години, поради стравувања од ретка појава на згрутчување на крвта, изјави денеска шефот на работната група на ЕМА за коронавирусот, Марко Кавалери.

Тој за италијанскиот весник „Стампа“ рече дека позицијата на ЕМА е сепак дека во контекст на пандемија, придобивките од вакцината се поголеми од можните ризици кај сите возрасни групи, пренесува „Ројтерс“.

Кавалиери изјави дека, со оглед на тоа дека епидемијата се намалува и младите се помалку изложени на ризици поврзани со вирусот, ЕМА смета дека би било подобро за нив да користат вакцини засновани на технологија mRNA, како што се оние на „Модерна“ и „Фајзер“.

Препораката важи и за постари од 60 години.

Кавалери потсети дека Франција и Германија одлучија да ја избегнат Астразенека за лица постари од 60 години.

Земјите-членки на ЕУ се согласија да ги ублажат ограничувањата за патувања во текот на летото, а целосно вакцинираните туристи од ЕУ ќе бидат ослободени од карантин, додека списокот на европски региони од кои е безбедно да се патува ќе биде проширен, велат дипломатите.

Амбасадорите од 27. земји-членки на ЕУ го одобрија модифицираниот предлог на Европската комисија луѓето кои ја примиле последната доза на вакцина пред 14 дена или повеќе, да немаат ограничувања за патување во друга европска земја, изјавија тројца европски дипломати.

Ограничувањата за другите патници треба да се засноваат на епидемиолошката состојба во земјата од која патуваат.

Ревидираните упатства беа усвоени во време кога ЕУ воведува сертификати со кои се потврдува дали патникот е вакциниран или има стекнато имунитет по болест од Ковид, или тест негативен за коронавирус.

Системот треба да биде подготвен за имплементација на 1 јули, иако некои земји, воведоа сертификати порано.

Европскиот блок ќе ги олабави ограничувањата на зоните обележани со различни бои.

„Зелените“ региони сега треба да имаат помалку од 25 случаи на 100.000 жители за 14 дена, а учеството на позитивните тестови е под 4 проценти.

Земјите-членки на ЕУ исто така ќе можат да ја повлечат „сопирачката за итни случаи“ и да забранат влез на сите патници од регион каде што има зголемување на заразната варијанта на болеста.

Претседателката на Европската комисија, Урсула фон дер Лајен, и претседателот на Европскиот совет, Чарлс Мишел, бараат да се спроведе истрага за потеклото на коронавирусот.

Целта, како што велат, е да се открие вистината за почетокот на пандемијата.

„Светот треба да знае што се случи за да извлечеме поуки. Ние ќе ги поддржиме сите напори да обезбедиме транспарентност и да ја откриеме вистината“, рече Мишел на прес-конференција.

Претседателката на Комисијата изјави дека треба да знаеме како точно настанала оваа страшна глобална пандемија. Урсула фон дер Лајен посочи на фактот дека многу се научи од финансиската криза во 2008 година.

„Имајќи предвид дека Европската Унија добро ја анализираше кризата и ги разви соодветните алатки, ние мора брзо да реагираме во сегашната здравствена криза. Сега треба да го сториме истото и да осигураме дека оваа криза нема да се повтори“, рече Лајен.

Како што додаде, сега е клучно да им се даде на истражителите целосен пристап до сите информации, кои се важни за утврдување на потеклото на пандемијата.