Турскиот министер за надворешни работи, Мевлут Чавушоглу, изјави дека Анкара не направила никакви отстапувања на неодамнешниот самит на лидерите на НАТО и дека одобрувањето на Турција за издавањето на планот на НАТО за во Балтичкиот Регион зависи од признавањето на пактот за заканата од терористичката организација ЈПГ/ПКК од северна Сирија, јавува Агенцијата Анадолија (АА).

Тој рече и дека Турција набавила ракетни системи земја-воздух С-400 од Русија поради одбивањето на НАТО да им продаде слично вооружување.

„На Турција и требаат противвоздушни системи. Дали се обидовме да ги купиме од нашите сојузници? Да, се обидувавме во последните 10 години. Но не можевме да ги добиеме. Значи, тоа нема никаква врска со политика“, изјави Чавушоглу.

Чавушоглу ги даде неговите изјави за време на посетата на Рим, каде што моментално се наоѓа за да присуствува на петтото издание на конференцијата „Медитерански дијалози“.

Осврнувајќи се на неодамнешниот поморски договор на Турција со Либија, Чавушоглу изјави дека Анкара е отворена за билатерални и мултилатерални договори во регионот на Источниот Медитеран, со единствен исклучок на администрацијата на кипарските Грци, која не ја признава.

Тој ја осуди одлуката на Грција за протерувањето на либискиот претставник во врска со поморскиот договор склучен минатиот месец помеѓу Триполи и Анкара, велејќи дека Атина го покажала своето лице со тој чекор.

Четири лица, вклучувајќи го и осомничениот напаѓач, се убиени денеска во военопоморската база Пенсакола, во американската сојузна држава Флорида, јавуваат американските медиуми.

Од канцеларијата на шерифот првично беше јавено дека во поморската база сè уште се наоѓа активен стрелец, а неколку минути подоцна беше соопштено дека полицијата го ликвидирала напаѓачот.

Покрај напаѓачот, убиени се уште три лица, соопшти морнарицата, без да даде детали за идентитетот на жртвите, пренесе „Ројтерс“.

Како што се наведува, повредени се најмалку единаесет лица.

Ова е втор смртоносен напад со огнено оружје во американските воени бази неделава. Портпаролот на Белата куќа соопшти дека американскиот претседател, Доналд Трамп, е информиран за инцидентот и дека ја следи ситуацијата.

Во базата Пенсакола се вработени повеќе од 16.000 војници и 7.400 цивилен персонал, а тука се наоѓа и Националниот музеј на морнаричката авијација, која е популарна регионална туристичка атракција.

Грција во понеделник организира работен појадок во Брисел со шефовите на дипломатијата на земјите членки на ЕУ и Северна Македонија и Албанија со порака за зајакнување на поддршката за нивниот европски пат.

„Работниот појадок што го организира Грција во понеделник е корисна можност за дијалог и зајакнување на европската перспектива за обете земји“, рече портпаролот на грчкото Министерство за надворешни работи, Александрос Гениматас.

Тој изјави дека досега 18 министри за надворешни работи на земјите од ЕУ го потврдиле нивното присуство.

Коментирајќи ја неодамнешната посета на грчкиот министер за надворешни работи Никос Дендијас на Скопје, Гениматас рече дека фокусот е ставен на билатералните односи, европската перспектива на Северна Македонија и теми поврзани со регионот.