Партнерката на британскиот премиер Борис Џонсон, Кери Сајмондс, доби забрана за влез во САД. Причина за забраната е, како што се наведува, тоа што Сајмондс, која е пријателка со активистка која се бори против генитално сакатење на жените, минатата година ја посетила самопрогласената африканска република Сомалиленд, која се наоѓа во Сомалија.

Сајмондс побарала дозвола за влез во САД за да учествува во активностите на непрофитната организација за заштита на океани, но била одбиена, пишува „Дејли мејл“.

Британците кои во САД патуваат преку системот ЕСТА, електронски систем за одобрување престој во САД, кој им овозможува без виза да поминат 90 дена, од март 2011 година мора да одговорат и на прашањето дали некогаш ја посетиле Сомалија и Сомалиленд.

САД не ја признаваат Сомалиленд како независна држава, туку ја сметаат како дел од Сомалија.

Сајмондс нема никаква улога во Владата на Борис Џонсон. Засега, ниту Кери Сајмондс, ниту британската Влада не ја коментираа американската забрана.

Протести во Турција поради владината одлука да смени тројца градоначалници во југоисточниот дел од земјата, каде што живеат Курди. Поради протестите полицијата употреби водени топови за да ја растера толпата.

Како што пренесуваат турските медиуми, најмалку 30 лица се приведени денеска во Дијарбакир, на третиот ден од протестите. Владата ги смени градоначалниците на Дијарбакир, Мардин и Ван, поради наводни врски со Работничката партија на Курдистан, која турските власти ја сметаат за терористичка организација.

Сменетите градоначалници, членови на прокурдската Народна демократска партија, се избрани на локалните избори во март. На нивни места се поставени државни гувернери.

Тие се обвинети за разни кривични дела, меѓу кои и членство во терористичка организација и ширење терористички пропаганди, соопшти турското Министерството за внатрешни работи.

Заштитата на слободата на мисла, свесност и религија е должност на ЕУ и нејзините земји членки, изјави високата претставничка за надворешна политика и безбедност на Европската Унија.

„Прогонот врз основа на верска определба директно се коси со меѓународното право, а ние мора да се бориме против тоа со здружени сили“, изјави Федерика Могерини.

Могерини додаде дека ЕУ отсекогаш била главен промотор и заштитник на верската слобода.

„Легислативата на ЕУ ги обврзува земјите членки да ги казнуваат јавните повици за насилство и омраза врз одредена група или поединци од група врз основа на религија или верска определба“, изјави Могерини.

„Маргинализирањето и издвојувањето на поединци кои припаѓаат на верски малцинства може да претставува знак за предупредување за многу посериозен прогон, како и показател дека треба да се преземат остри мерки во однос на целото општество“, додава таа.

Некои од земјите членки на ЕУ, како на пример, Грција, честопати трпат критика поради крешње на правата на малцинството Турци муслимани во нивните граници, а некои случаи се косат и со законите на Европскиот суд за човекови права.