Француските власти ќе ги прекинат сите летови меѓу Франција и Бразил со цел да се спречи ширењето на новиот вид на коронавирус, откриен во таа јужноамериканска земја, изјави францускиот премиер Жан Касте.

Во обраќањето пред францускиот парламент во Париз, Касте рече дека властите се свесни дека епидемиолошката состојба се влошува и одлучија да ги прекинат сите летови меѓу Франција и Бразил до ново известување.

Неколку водечки француски лекари со денови ги повикуваат властите да го прекинат воздушниот сообраќај на релација со Бразил.

Француската министерка за здравство Оливија Веран минатиот месец изјави дека видови од вирусот корона од Бразил и Јужна Африка се регистрирани кај околу шест проценти од заразените во Франција.

Иран планира да го зголеми збогатувањето на ураниум на 60 проценти, се вели во извештајот на државната новинска агенција ИСНА.

Заменик-министерот за надворешни работи Абас Арагчи треба да ја извести Меѓународната агенција за атомска енергија (МААЕ) за овој потег, што следи по кибернападот врз иранската нуклеарна централа Натанц.

Иран го обвини долгогодишниот непријател Израел дека ја саботира неговата клучна нуклеарна централа Натанц и вети дека ќе се одмазди за нападот.

Техеран го обвинува Израел за терористички акт насочен кон саботирање на разговорите во Виена, кои треба да продолжат кон крајот на неделава, а со тоа и за нуклеарниот договор со пет членки на Советот за безбедност и Германија.

Досега Иран збогатуваше ураниум на 20 проценти, иако нуклеарниот договор од 2015 година предвидува максимално збогатување од 4 проценти.

Во телефонски разговор со неговиот руски колега Владимир Путин, американскиот претседател Џо Бајден му предложил да одржат состанок во трета земја, објави Белата куќа.

„Претседателот Бајден ја потврди својата цел: да изгради стабилни и предвидливи односи со Русија во согласност со интересите на САД и предложи одржување на самит во трета земја во текот на следниот месец за да се разговара за целиот спектар на прашања со кои се соочуваат САД и Русија“, се наведува во изјавата.

За време на телефонскиот разговор, Бајден изрази загриженост за „наглото“ зголемување на руските воени сили на границата со Украина.

„ Бајден ја истакна непоколебливата посветеност на САД за поддршка на суверенитетот и територијалниот интегритет на Украина“, се заклучува во соопштението.