Велика Британија ќе му помогне на Израел во потрагата по заложниците на Хамас во Појасот Газа, соопшти британската влада.

„Како поддршка на активностите за спасување заложници, Министерството за одбрана на Обединетото Кралство ќе спроведе воздушни патроли над источниот Медитеран, вклучително и операции во воздушниот простор над Израел и Газа“, објави вчера вечерта британската влада.

Претставници на Министерството за одбрана изјавија дека голем број невооружени авиони ќе се користат за извидувачки летови, вклучувајќи го и Shadow R1, кој се користи за собирање разузнавачки информации. Авионите ќе се користат исклучиво за лоцирање на заложниците, а само информациите поврзани со нивното спасување ќе бидат проследени до надлежните органи, соопштено е.

Палестинското исламистичко движење Хамас киднапираше околу 240 луѓе за време на нападот врз Израел на 7 октомври.

Израел и Хамас минатата недела се согласија на првото примирје со посредство на Катар, Египет и Соединетите Држави, и тоа накратко беше продолжено двапати. За време на примирјето, Хамас ослободи 105 заложници, а Израел ослободи 240 палестински затвореници.

Израел претпоставува дека уште 137 луѓе се заробени во Појасот Газа. Израелскиот министер за одбрана, Јоав Галант, изјави дека меѓу нив има 15 жени и две деца. Хамас најави дека ќе ги продолжи преговорите за ослободување на преостанатите заложници дури кога ќе заврши војната во Газа. Примирјето заврши во петокот наутро, а борбите повторно се разгореа.

Шпанската национална полиција во заедничка акција со царинските службеници во јужното пристаниште Алгесирас заплени речиси еден тон кокаин скриен во контејнери доставени од Јужна Америка, а дрогата припаѓала на балканскиот картел, објави полицијата на својата веб-страница.

„Балканскиот картел во моментов е најактивен на европско ниво“, се наведува во соопштението.

Полицијата тврди дека групи од Латинска Америка испраќаат кокаин скриен меѓу легални стоки во контејнери кои пристигнуваат со брод во шпанските пристаништа. Акцијата почна по дојава за пристигнување на контејнер со „значително количество кокаин“ во Алгесирас, едно од најголемите пристаништа во Шпанија, во провинцијата Андалузија.

Агентите кои подолго време ги истражуваат активностите на балканскиот картел имале и информации дека и оваа група составена од граѓани од територијата на поранешна Југославија барала начин да го преработи тој кокаин. Истовремено, од Колумбија добиле предупредување дека брод од Еквадор, кој се закотвува во Колумбија, има намера да транспортира кокаин до пристаниште во Шпанија.

Агентите го идентификувале бројот на бродот, а кога тој запловил во Алгесирас, истражителите ги отвориле контејнерите и пронашле 415 килограми од дрогата. Врз основа на новите информации дознале дека во Алгесирас пристигнува уште еден контејнер со дрога, па во него пронашле дополнителни 500 килограми кокаин, се наведува во соопштението.

„Тешкотијата во истрагата за членовите на овие организации лежи во нивната мобилност. Тие се способни да патуваат илјадници километри за да одржат состанок“, извести шпанската полиција.

„Истрагата продолжува со цел да се идентификуваат сите членови на мрежата и да се уапсат“, се додава.

Засега не се знае дали некој е уапсен при откривањето на контејнерот со кокаин. Портпаролката на полицијата не се јавила на телефон во неделата наутро.

Најмалку едно лице загина во земјотресот со јачина од 7,4 степени според Рихтеровата скала што го погоди јужниот дел на Филипините, а забележана е помала штета на локалните инфраструктурни објекти, соопштија денеска филипинските власти и потврдија дека на жителите од погодените области им било дозволено да се вратат дома.

Синоќешниот земјотрес ја погоди провинцијата Јужен Суригао, кој веднаш по земјотресот предизвика евакуација и предупредување за цунами на Филипините, како и во Јапонија, пренесува Ројтерс.

„Една жена загина кога се урнал ѕидот од куќата од која се обидувала да побегне со семејството“, изјавил претставник на Службата за вонредни ситуации.

Националниот институт за вулканологија и сеизмологија соопшти дека заканата од цунами на Филипините поврзана со овој земјотрес во голема мера поминала.

Локалното радио ДВПМ објави дека на граѓаните во погодените заедници им било советувано да ги слушаат упатствата на локалните власти.

Во меѓувреме, граѓаните евакуирани од крајбрежниот град Караскал во јужен Суригао се вели дека се вратиле дома.

„Подготвени сме да организираме нова евакуација доколку е потребно“, се наведува во соопштението на локалните власти, додавајќи дека филипинската крајбрежна стража ги ставила на подготвеност сите свои пловни објекти и авиони.