Американскиот Сенат едногласно го потврди републиканскиот сенатор Марко Рубио, остар критичар на Кина и цврст поддржувач на Израел, за државен секретар на претседателот Доналд Трамп.

Сенатот го поддржа Рубио со 99-0 гласови, неколку дена откако долгогодишниот член на комисиите за надворешни односи и разузнавање на Сенатот го помина сослушувањето за потврда на Конгресот.

Рубио стана првиот од кандидатите за кабинетот на Трамп потврден од Сенатот, само неколку часа откако претседателот положи заклетва за втор мандат во Белата куќа.

Оваа недела се очекуваат и други гласања за номинираните на Трамп.

Рубио (53) е остар критичар на Кина и поддржувач на Израел. Синот на имигрантите од Куба, исто така, се залага за остри мерки против островот со кој владее комунизмот и неговите сојузници, особено владата на венецуелскиот претседател Николас Мадуро.

За време на сослушувањето во Конгресот, тој предупреди дека САД мора да го сменат курсот за да избегнат повеќе да се потпираат на Кина и вети силна надворешна политика фокусирана на американските интереси.

Рубио рече и дека американската политика треба да биде војната во Украина да заврши.

Тој рече дека постигнувањето договор за прекин на огнот ќе вклучи отстапки и од Москва и од Киев и посочи дека Украина ќе мора да се откаже од својата цел да ја врати целата територија што Русија ја зазеде во изминатата деценија.

Рубио е првиот човек со шпанско потекло кој служи како врвен дипломат во земјата.

Улогата на Светската здравствена организација (СЗО) треба само да се зајакне, а не да се ослабне, соопшти денеска кинеското Министерство за надворешни работи, откако американскиот претседател Доналд Трамп најави повлекување од организацијата. Кина ќе продолжи да ја поддржува СЗО во исполнувањето на нејзините одговорности, изјави портпаролот на министерството Гуо Џиакун на редовната прес-конференција.

Трамп денеска објави дека Соединетите држави ќе се повлечат од Светската здравствена организација, објаснувајќи дека, според него, глобалната здравствена агенција погрешно се справила со пандемијата „Ковид-19“ и со другите меѓународни здравствени кризи. Трамп, исто така, рече дека СЗО не успеала да биде независна од несоодветно политичко влијание од земјите-членки и дека барала големи плаќања од Соединетите држави, несразмерни со сумите обезбедени од други поголеми земји, како што е Кина.

„СЗО не украде, сите крадат од Соединетите држави. Тоа нема да се повтори“, рече Трамп при потпишувањето на извршната наредба за повлекување, набргу по неговата инаугурација за втор мандат.

Овој потег значи дека САД ќе ја напуштат здравствената агенција на Обединетите нации за 12 месеци и ќе ги стопираат сите финансиски придонеси за нејзината работа. САД се убедливо најголемиот финансиски поддржувач на СЗО, со околу 18 отсто од вкупното финансирање.

Последниот двегодишен буџет на СЗО, за 2024 и 2025 година, изнесуваше 6,8 милијарди долари. Заминувањето на САД најверојатно ќе ги загрози програмите низ организацијата. Повлекувањето на Трамп од СЗО не е неочекувано. Тој, исто така, сакаше да ја напушти организацијата во 2020 година, за време на неговиот прв претседателски мандат, обвинувајќи ја СЗО дека и помага на Кина во нејзините напори да го измами светот за потеклото на коронавирусот. Според американскиот закон, напуштањето на СЗО бара отказен рок од една година и плаќање на сите неподмирени обврски.

Земјотрес со јачина од 6,4 степени според Рихтеровата скала го погоди јужниот дел на Тајван, при што беа повредени 27 лица а предизвикана е и материјална штета.

Епицентарот на земјотресот бил на околу 40 километри југоисточно од округот Чијаи, на длабочина од 10 километри, соопшти тајванската централна метеоролошка агенција.

Материјална штета има во градовите Чиао и Таинан.

Пожарникарите соопштија дека 27 лица се хоспитализирани со полесни повреди.

Спасувачите се уште се на терен, а засега нема информации за смртни случаи, пренесоа медиумите во светот.