Педесетгодишна жена загина на протест во регионот Савој, во Франција, на протест организиран поради зголемување на цените на горивата.

„Жената загинала од удар од автомобил кога една мајка со дете се испаничила кога учесниците на протестот го опколиле нејзиното возило и почнале да удираат по него“, соопшти француската полиција.

Мајката се испаничила и со автомобилот тргнала кон толпата и ја усмртила жената.

Во протестите ширум Франција се повредени најмалку 47 луѓе, од кои тројца се во критична состојба. Приведени се 24 лица.

Ширум Франција денеска се одржуваат протести поради зголемување на цените на горивата, а учесниците носат жолти елеци и извикуваат: „Макрон е диктатор“.

Германија постави нов шеф на разузнавачката служба БФВ, која во последните години се соочи се разни скандали.

Томас Халденванг, кој моментно е потпретседател на службата, беше назначен за претседател на разузнавачката агенција, соопшти министерот за внатрешни работи, Хорст Зехофер, на конференција во Берлин.

Претходникот на Халденванг, Ханс-Георг Масен, беше отпуштен минатата недела кога упати неколку контроверзни коментари кон канцеларката Ангела Меркел и нејзината владејачка коалиција, како и неговите наводни контакти со високи функционери од екстремната десничарска партија АФД.

Социјалдемократите остро го критикуваа Масен за кој тврдеја дека не сфаќа колку сериозни се десничарските екстремистички групи и заканите што доаѓаат од нив.

Неколку пратеници од Конзервативната партија на британската премиерка Тереза Меј соопштија дека поднеле писмо за гласање недоверба на премиерката, а лондонските медиуми очекуваат во текот на денот да бидат предадени неопходни 48 писма за да се поведе постапката.

Лондонски „Телеграф“ јави дека со очекување до крајот на денот да бидат предадени 48 писма гласањето на недоверба на владата би можело да се изврши уште во вторник.