Објавени се нови детали за страшното масовно убиство што се случи вчера во Основното училиште во Тексас. Во нападот на Салвадор Рамос загинаа 19 деца и двајца возрасни, а последните информации укажуваат дека убиецот се забарикадирал во училница и ги убил своите жртви.

Во нападот загинаа двајца учители и 19 деца на возраст до десет години.

Додека Рамос пукал кон своите жртви, полицајците кружеле низ училиштето, кршејќи ги стаклата на прозорците во обид да ги евакуираат децата и персоналот. Успеале насилно да влезат во училницата и да го ликвидираат напаѓачот кој пукал и кон нив, објасни портпаролот на отсекот за јавна безбедност во Тексас, Крис Оливарез.

Како што наведе, идентификувани се сите жртви и информирани се нивните семејства. Тој истакна дека во нападот се повредени неколку деца, но не кажа колку и во каква здравствена состојба се.

„Станува збор за мала училница, која може да прими од 25 до 30 ученици. Во училницата имаше двајца учители. Во овој момент немаме информации колку ученици имало внатре. Бројката може да варира“, изјави Оливарез, нагласувајќи дека станува збор за организиран престој во кој престојувале групи деца.

Запрашан дали училиштето било крајната цел на напаѓачот, Оливарез рече дека се’ уште има многу прашања на кои полицијата нема одговори.

„Се обидуваме да го откриеме тоа. Во случајот е вклучен и ФБИ, а ги анализираме и социјалните мрежи. Она што го знаеме за напаѓачот е дека тој бил жител на Увалде, дека учел во едно од локалните средни училишта, дека живеел со баба му и дедо му, дека е невработен, дека немал пријатели или девојка“, изјави Оливарез.

Тој истакна и дека убиецот нема криминално досие, ниту пак бил поврзан со криминални групи.

Оливарез рече дека Рамос имал една пушка кога влегол во училиштето, а властите работат на утврдување на видот и капацитетот на пушката.

Додаде дека напаѓачот носел елек, во кој можел да чува дополнителна муниција.

Оливарез изјави дека бабата на напаѓачот, која ја застрелал пред да се упати кон училиштето се’ уште е жива и дека властите се обидуваат да го лоцираат неговиот дедо и членовите на неговото потесно семејство.

„Она што го знаеме е дека напаѓачот бил вклучен во инцидент со неговата баба пред нападот на училиштето. Потоа ја застрелал својата баба. Побегнал со возило и бил во близина на училиштето кога полицијата ја добила првата пријава за сообраќајна несреќа и вооружено лице кое влегува во училиштето“, изјави портпаролот на полицијата.

Рускиот претседател Владимир Путин потпиша указ за поедноставување на доделувањето државјанство на Руската Федерација на жителите на регионите Запорожје и Херсон во Украина, кои се под контрола на руските сили.

Документот е објавен на официјалниот интернет-портал за правни информации.

Словачкиот премиер Едуард Хегер испрати силно предупредување за иднината на неговата земја во случај Русија да ја победи Украина. Хегер за време на панелот на Светскиот економски форум во Давос, Швајцарија, рече: „Ако Украина падне, Словачка е следната“.

„Украина мора да победи“, рече Хегер на панелот на кој присуствуваа голем број европски политички и деловни лидери.

Словачкиот премиер ги критикува членките на ЕУ дека премногу се потпираат на руската енергија и ги повика европските лидери да престанат да ги компромитираат нивните принципи кога имаат работа со Русија.

„Предолго ги продаваме нашите вредности за евтин гас и нафта. Компромисите со Путин предизвикаа војна во Украина. Зборуваме за агресивна војна во која луѓето масовно гинат. Украинците ја пролеваат својата крв за нашите вредности за ние да не мораме“, рече Хегер пренесе Си-ен-ен.