Американскиот претседател Џо Бајден ги критикуваше одлуките за ублажување на мерките против Ковид-19 во сојузните држави Тексас и Мисисипи и го нарече ваквото размислување неандерталско во ситуација кога има поголем број смртни случаи од пандемијата на коронавирус, пренесува „Ројтерс“.

Агенцијата наведува дека на новинарско прашање за тоа дали има порака за гувернерите од Тексас и Мисисипи, кои донеле одлука за укинување на обврската за носење маски, Бајден рекол дека тоа е голема грешка и дека сите веќе разбрале колку е важно носењето маски во борбата против вирусот.

„Последното нешто што ни треба е неандерталско размислување – сè е во ред, тргнете ги маските. Заборавете на тоа. Сепак е важно да носите маски”, рече американскиот претседател пред состанокот со пратениците од редовите на демократите и републиканците посветен на борбата против ракот.

Бајден истакна дека зголемената достапност на вакцините е клучна во спречувањето на пандемијата, но дека примената на мерките поврзани со носење маски, миење раце и физичко растојание и натаму е од најголема важност.

„Ројтерс“ известува дека на прашањето за изјавата на Бајден, гувернерот на Мисисипи, Тејт Ривс, за „Фокс њуз“ изјавил дека повеќе немаат здравствена криза во таа сојузна држава и нагласил дека би сакале да видат претседател кој повеќе им верува на Американците, наместо да ги навредува.

Претставничкиот дом на американскиот Конгрес ја откажа седницата планирана за денес, по предупредувањето на полицијата во Капитол Хил дека во зградата можат да упаднат екстремисти.

Претставничкиот дом требаше да расправа за предлог-законот за полициска реформа, но еден од членовите на тоа тело рече дека полициското предупредување, засновано на разузнавачки податоци, претставува голем ризик и затоа плановите биле променети, наведува „Гласот на Америка“.

Властите велат дека екстремистите кои планирале да го нападнат Конгресот припаѓаат на група поддржувачи на поранешниот претседател Доналд Трамп, кој упадна во Конгресот на 6 јануари за да спречи потврда за победата на Џо Бајден на претседателските избори. Полицијата во Капитол ја нарече групата екстремисти кои планираа упад „неидентификувана милитантна група“.

Во полициското соопштение се наведува дека се воведени значителни промени и зголемени безбедносни мерки во Капитол, каде што се наоѓаат Претставничкиот дом и Сенатот. Не е познато дали овие промени се воведени заради последната закана или дали станува збор за мерките за кои станува збор по немирите на 6 јануари.

Во теориите на заговор на десницата, 4 март се спомнува како ден кога Трамп, инаку поразен на изборите на 3 ноември, требаше да даде заклетва за втор мандат. Тоа беше денот на претседателските инаугурации се до 1933 година.

Во Србија, според последните владини податоци, досега се дадени 1.535.274 вакцини против коронавирус, а втора доза добиле 534.751 лице.

Србија е убедливо прва во регионот според бројот на вакцини на милион жители, по што следуваат Унгарија, Словенија, Романија, Хрватска, Бугарија, Албанија и Црна Гора. Србија е на прво место во регионот според бројот на граѓани кои ја примиле втора доза вакцина на милион жители.

Според вкупниот број вакцини и ревакцинации, Србија е втора во регионот, по Романија.

Кога станува збор за бројот на вакцинации на милион жители, Србија е на седмото место во светот – по Израел, Сејшелите, Обединетите Арапски Емирати, Велика Британија, САД и Малдивите.

Според бројот на вакцинации на милион жители, Србија е втора во Европа, по Велика Британија.

Кога станува збор за бројот на оние кои ја примиле втората доза на вакцина на милион жители, Србија е прва во Европа и петта во светот, по Израел, Сејшелите, Обединетите Арапски Емирати и САД.