Главниот епидемиолог на САД, Ентони Фаучи, изјави дека вакцината против Ковид-19 на „Астразенека“ има добра ефикасност, но дека треба да се решат сомнежите за нејзината безбедност.

„Мислам дека вакцината на ‘Астразенека’ е добра вакцина во однос на ефикасноста, и ако се решат проблемите со безбедноста во Европската Унија, ефективноста на вакцината е навистина добра“, изјави Фаучи за радио Би-би-си.

Европските регулатори ја тестираат вакцината на „Астразенека“ за појава на ретки појави на згрутчување на крвта. Сè уште не е одобрена во САД.

Европските регулатори идентификуваа можна врска помеѓу вакцините и тромбите, но нагласуваат дека придобивките од вакцините ги надминуваат ризиците.

Повеќе од дванаесет земји ја прекинаа употребата на вакцината, но потоа продолжија да ја користат, а некои воведоа минимална граница на возраста, вклучително и Франција, Холандија и Германија.

Официјални лица во Велика Британија ги советуваа луѓето на возраст под 30 години да добијат друга вакцина.

Вакцината на „Астразенека“ е далеку најевтина досега и не бара посебни услови за чување на екстремно ниски температури како некои други вакцини, па затоа е главната вакцина во многу кампањи за вакцинација.

По веста во светот дека Армин Лашет е новиот кандидат на Демохристијанската партија за нов канцелар на Германија, сите очекуваа Ангела Меркел да се огласи по повод неговата кандидатура.

Како дел од денешното обраќање на Меркел за моментната состојба во врска со коронавирусот во земјата, многумина очекуваа коментар за кандидатурата за претстојните избори, но таа на медиумите им даде само кус коментар – дека не сака да се меша во прашањето кој ќе биде кандидат на ЦДУ/ЦСУ за иден канцелар.

„Сакав, сакам и ќе останам настрана“, рече таа.

Една од причините зошто јавноста сакаше да го коментира изборот на кандидат на нејзината партија е неодамнешниот конфликт што го имаше со Лашет.

Тој се судри со Меркел за антиепидемиските ограничувања, а популарноста што ја уживаше како премиер на Северна Рајна-Вестфалија, најнаселената покраина во Германија, беше компромитирана од хаотичното управување со пандемиската криза.

Многу конзервативци се нервозни за изборите во септември бидејќи Ангела Меркел ги предводеше во четири изборни победи. Таа не поддржа експлицитно ниеден од кандидатите, но навести дека ќе му ја даде својата поддршка на лидерот на ЦДУ.

Во последните 24 часа во Србија се потврдени 3.572 нови случаја на коронавирус, а 35 лица починаа. Направени се 16.116 теста.

Во последните денови во Србија се забележува пад на бројот на нови случаи, вчера беа отворени трговските центри, а набргу учениците ќе се вратат во училиштата.

Во текот на неделата кризниот штаб треба да донесе одлука за отворање на внатрешните делови на угостителските објекти.

Сепак, многу забрани остануваат во сила, како што е забраната за собирање повеќе од пет лица.