Во Бразил уште еден затворски бунт, по оној со 60 жртви

Уште еден бунт во затвор избувна во понеделникот во северниот дел од Бразил, пренесува во понеделникот телевизијата Globo, откако претходно беше објавено дека најмалку 60 луѓе се убиени во бунтот во затворот во близина на истиот град Манаус, во северозападен Бразил, меѓу две ривалски нарко банди.

Засега нема информации за настрадани или побегнати затвореници во вториот инцидент. Бунтот избувнал во центарот за привремен престој за мажите, во кој во моментов има 1.586 осуденици. Притоа, во извештаите се истакнува дека капацитетот на овој затвор изнесува 568 лица, како и дека од затворот се слушале истрели.

Познато е дека бразилските затвори се пренатрупани, а условите во нив се страшни, што и во минатото поттикнуваше крвави бунтови. Меѓународните невладини организации остро ги критикуваат бразилските власти поради многу лошо организираниот затворски систем.

Претходно ноќта кон понеделникот во другиот затвор во истиот град Манаус, во затворскиот комплекс „Анисиу Жобин“ избувна бунт во кој животите ги загубија најмалку 60 затвореници, кој траеше повеќе од 17 часови.

Бразилскиот министер за внатрешни работи Амасонас Сержиу Фонтес на прес-конференција изјави дека бројот на настраданите би можел да биде поголем, откако властите добиваат попрецизни податоци за димензиите на бунтот кој започнал во неделата ноќта, а поттикнал судир меѓу две противнички групи кои растураат дроги.

Весникот Manaus’Em Tempo објави дека неколку обезглавени тела биле фрлени преку затворскиот ѕид.

Властите уште ги пребројуваат затворениците за да утврдат колку евентуално побегнале.

Крвавиот судир во Манаус е еден во низата слични инциденти меѓу двете ривалски нарко банди, најмоќната во Бразил – PCC и локалната нарко група позната како Северно семејство.

Според медиумите примирјето меѓу нив „пропаднало“ минатата година, резултирајќи со повеќемесечни крвави затворски пресметки и судири меѓу нивните припадници, а во јавноста се појавија стравувања хаосот да не се прошири и на другите затвори низ земјата.

Во бунтот во понеделникот имало и престрелка меѓу полицијата и затворениците, а дел од затворениците заробиле дванаесет затворски чувари. Во текот на бунтот затворениците земале како заложници друг 74 затвореници, некои ги пуштиле а некои ги погубиле./крај/мф/сн