Европската агенција за лекови треба да ја одобри употребата на вакцината против коронавирус на компанијата „Џонсон и Џонсон“ на 11 март, пренесуваат „Ројтерс“ и „Блумберг“.

Американската фармацевтска компанија на почетокот на месецов поднела барање за условно одобрување на вакцината до Европската агенција за лекови (ЕМА). Минатата недела ЕМА соопшти дека ќе го објави своето мислење до средината на март.

ЕУ досега ги одобри вакцините произведени од „Фајзер/ Бионтек“, „Модерна“ и „Астразенека“.

Германската држава одлучи да им додели највисок орден на основачите на фармацевтската компанија „Бионтек“, која прва разви и лансираше вакцина против коронавирус на пазарот.

Како што беше соопштено од кабинетот на претседателот на Германија, шефот на германската држава, Франк Валтер Штајнмаер, на 19 март ќе го предаде „Крстот за заслуги со ѕвезда“ на брачната двојка научници Oзлем Туречи и Угур Шахин.

Тоа ќе му биде прво лично врачување на ордени на Штајмер оваа година, а ќе се одржи во палатата Белви во Берлин.

Шеснаесет членови на Европскиот парламент побараа од министерот за надворешни работи на ЕУ, Џозеп Борел, да го смени амбасадорот на ЕУ во Куба, Алберт Наваро, бидејќи тој наводно се приклонил на тамошниот режим, кој ниту ги почитува ниту ги брани човековите права.

„Сакаме да ја искажеме нашата збунетост и неодобрување за невообичаеното и редовно однесување на амбасадорот на Европската Унија во Куба, г. Алберт Наваро“ – се наведува во писмото потпишано од пратениците од Европската народна партија (ЕПП), „Изгради ја Европа“ и групите на Европските конзервативци и реформатори, пренесува бриселски „Политико“.

Пратениците изјавија дека Наваро, меѓу другото, потпишал и писмо упатено до претседателот на САД, Џо Бајден, во кое бара укинување на американските санкции за Куба и немешање во нејзините работи.

Пратениците заклучија дека Наваро зазема политички ставови слични на оние на режимот во Куба и дека си дозволува слободи кои се потипични за политички лидер отколку за дипломатски претставник.

„Политико“ наведува и дека портпаролот на Борел не бил достапен за коментар.