Унгарскиот премиер Виктор Орбан денеска изрази надеж дека во рок од неколку дена, националниот регулатор на лекови јасно ќе одговори дали може да се користи кинеската вакцина против коронавирус.

Во обид да се забрза вакцинацијата, владата на Орбан во четвртокот објави дека се согласила да купи вакцина од кинескиот производител „Синофарм“.

Со репутација на земја која не се двоуми да отстапи од регулативите на Брисел, Унгарија на тој начин би станала првата членка на Европската унија што одобрила употреба на кинеска вакцина против Ковид-19.

Унгарија во четвртокот усвои декрет за набавка на вакцини надвор од централизираниот систем на Европската унија, откако нејзиниот министер за надворешни работи рече дека европскиот систем за снабдување е скандалозно бавен.

„Има повеќе од милион дози кинеска вакцина што може да се користат во рок од неколку дена“, рече Орбан.

Унгарските капацитети за вакцинација се далеку поголеми од количината што е достапна преку набавките обезбедени од ЕУ, објасни тој.

Досега, Унгарија вакцинираше повеќе од 105.000 луѓе (здравствени работници и жители на домови за стари лица) со вакцини од два производитела, односно вакцината на „Фајзер“ и онаа од „Модерна“.

„Доколку има доволно дози на вакцина, Унгарија би можела да вакцинира половина милион луѓе на ден“, рече Орбан.

Според истражувањето спроведено од Централниот завод за статистика во петокот, расте бројот на Унгарци склони кон вакцинирање, иако досега само 27 отсто од нив се цврсто подготвени за таков чекор.

Паметните часовници во Русија може да се третираат како специјални технички уреди чиј увоз на територијата на Руската Федерација е ограничен, доколку нивната функционалност дозволува скриено фотографирање и снимање видеосодржини, посочија руските царински власти.

Пратеникот Антон Горелкин побара од агенцијата за безбедност ФСБ и Федералната царинска служба појаснување дали увозот во Русија и купувањето часовници со вградени камери ќе се смета за легално.

Царината одговори дека во специјални технички средства дизајнирани за тајно собирање информациии се вклучуваат и уреди во кои намерно се вградуваат карактеристики што овозможуваат собирање класифицирани податоци.

Уредот, како што велат од руската царина, не се смета за „шпионски“ доколку функциите за фотографирање и снимање видеоматеријали се стандардно наведени во брошурата за производот, леќата на вградената камера не е скриена и има елементи на екранот кои го покажуваат методот на снимање.

„Така, според Федералната царинска служба на Русија, можноста за класифицирање на паметните часовници како специјални технички средства зависи од вградената функционалност и техничките карактеристики на одреден модел. Ако функционалноста и техничките карактеристики на паметните часовници одат во насока на нивно калсифицирање како посебни технички средства, увозот на таквите уреди за лична употреба од страна на поединци е забранет, вклучително и нарачката преку странски интернет-страници“, објаснува руската царина.

Горелкин, пак, има забелешка на ваквите параметри на царината, со објаснување дека еден ист производител може да произведува и легални и нелегални паметни часовници според ваквата класификација.

Претходно, во руските медиуми се појави информација дека камера може да се појави во следната серија на паметни часовници од „Епл“.

Германската канцеларка, Ангела Меркел, наводно размислува за воведување досега најстрогo заклучување во земјата, пишува „Билд“.

Ваквата блокада би значела целосно затворање на државата.

Денеска, во Германија е забележан рекорден број смртни случаи од корона. Имено, починаа 1.244 лица, а вкупниот број смртни случаи од почетокот на пандемијата се искачи на 43.881.

Претходно, земјата забележа најголем број смртни случаи на 8 јануари кога починаа 1.188 заразени пациенти.

Според Институтот „Роберт Кох“, бројот на заразени на дневна основа е зголемен за 25.164 нови случаи, а вкупниот број на досега заразени е 1.978.590 лица.

Во меѓувреме, училиштата, продавниците што не продаваат основни продукти, баровите, рестораните и објектите за забава и култура се затворени со мерки што постепено се интензивираат од нивното воведување на почетокот на ноември.

Мерките, кои исто така предвидуваат дека едно домаќинство може да го посетува само едно лице надвор од тој круг, треба да останат во сила најмалку до крајот на јануари.

Канцеларката Ангела Меркел и другите членови на владата веќе предупредија дека мерките може да продолжат и по јануари.

Се очекува германската канцеларка да разговара за следните чекори во борбата против пандемијата на 25 јануари на состанокот со премиерите на 16 сојузни покраини.