Епидемиологот и член на кризниот штаб на Србија, Предраг Кон, изјави дека медицинскиот дел од кризниот штаб бара многу построги мерки односно целосно затворање, освен продавниците за храна, аптеките и бензинските пумпи.

„Имавме гужви за време на викендот поради скратување на работното време и не мислам дека многу ќе се забележат последиците од оние мерки што важеа за викендот“, рече Кон.

Кога станува збор за целосно затворање, Кон вели дека е потребно да се затворат сите објекти минимум седум до 10 дена.

Ова би значело дека објектите ќе бидат затворени, но потребно е да се воведат итни мерки.

„Ова трае долго и не треба да дозволиме нон-ковид болниците да се вратат во ковид-системот“, вели Кон.

Лична одговорност, вели тој, очигледно не може да се очекува.

„Факт е дека се откриени незаконски собири кои овозможуваат понатамошно ширење на вирусот“, додаде српскиот епидемиолог.

„Единствената реална работа е да се преземат построги мерки и за нив е потребна вонредна состојба“, рече тој.

Европската Унија донесе одлука за забрана за влез и замрзнување на имотот на четворица руски официјални лица одговорни за случајот со Алексеј Навални.

Санкционираните лица се блиски соработници на рускиот претседател Владимир Путин. Тоа се Александар Бастрикин, Игор Краснов, Виктор Золотов и Александар Калашников.

Краснов е главен обвинител на Русија, Золотов е шеф на руската национална гарда, Калашников е шеф на рускиот затворски систем, а Бастрикин е началник на Кривичниот комитет за истраги.

Оваа одлука претставува спроведување на договорот на министрите за надворешни работи на земјите членки од 22 февруари.

Тогаш беше постигнат политички договор за воведување санкции за одговорните за затворањето и осудувањето на рускиот опозициски активист Алексеј Навални.

Навални беше уапсен и осуден во јануари, откако се врати во Русија од Германија, каде што се лекуваше од труење со „новичок“, што предизвика протести низ цела Русија, а властите одговорија со апсење на демонстрантите.

Ова е првпат ЕУ да ја спроведе новата рамка за санкции против прекршителите на човековите права, која беше воспоставена во декември минатата година, според американскиот закон Магники.

Оваа рамка овозможува да се санкционираат физички и правни лица за кршење на човековите права насекаде во светот.

Претходно и САД воведоа санкции за руски државјани и фирми, а одлуката е донесена во координација со Европската Унија.

Претседателот на Украина, Володимир Зеленски, денеска се вакцинира против коронавирусот за време на посетата на фронтот во источниот дел на Донбас, со надеж дека ќе ги увери скептиците дека вакцината е безбедна и ефикасна.

Заостанувајќи зад Европа, Украина само што започна со вакацинација на населението откако минатиот месец ја доби првата пратка од 500.000 вакцини на „Астразенека“, давајќи им приоритет на здравствените работници од првата линија во борбата со вирусот и војската.

Сепак, владата се соочува со борба против скептицизмот во врска со вакцината. Податоците покажуваат дека 47 проценти од населението не сака да се вакцинира.

„Ја примив вакцината против Ковид-19. Се вакцинирав на фронтот со војниците како врховен командант”, напиша Зеленски на „Твитер“ и објави фотографија на која се гледа како ја прима вакцината.

Тој рече дека станува збор за вакцината „Оксфорд/Астразенека“ произведена во Индија.