Мета донираше 1 милион долари на инаугуративниот фонд на новоизбраниот претседател Доналд Трамп, потврди компанијата за Си-ен-ен.

Да потсетиме, шефот на Мета, Марк Цукерберг, пред две недели приватно се сретна со Трамп во Мар-а-Лаго, а Си-ен-ен претходно објави дека Цукерберг бара поактивна улога во обликувањето на технолошката политика на идната администрација.

Тоа е голем пресврт од пред речиси четири години кога Мета го забрани Трамп на своите платформи по нападот на Капитол на 6 јануари 2021 година.

Во пресрет на овие избори, Цукерберг постепено покажа афинитет кон Трамп. Во интервјуто летото, основачот на Фејсбук рече дека одговорот на Трамп на обидот за атентат во јули бил „опасен“.

„Да го видам Доналд Трамп како станува откако е застрелан и ја става тупаницата во воздух со американско знаме е една од најопасните работи што сум ги видел во животот“, рече тој за време на интервјуто.

Трамп во интервјуата и претходните настапи се фалеше за разговорите што ги имал со технолошките титани, а сега ги фали компаниите што некогаш ги обвинуваше за неговиот пораз на изборите во 2020 година.

Американскиот државен секретар Ентони Блинкен пристигна вчера во Турција на разговори фокусирани на клучниот аспект за воспоставување стабилност во Сирија, додека на север избувнаа судири меѓу проамериканските Курди и протурските бунтовници.

Блинкен се сретна со турскиот претседател Таип Ердоган на аеродромот Есенбога по посетата на Јордан на неговото прво патување во регионот по падот на владата на сирискиот претседател Башар ал-Асад во неделата.

Блинкен и Ердоган разговараа за најновите случувања во Сирија, при што Блинкен го истакна взаемниот интерес на САД и Турција за политичка транзиција кон одговорна и инклузивна сириска влада, рече портпаролот на Стејт департментот Метју Милер.

Блинкен ја истакна потребата коалицијата што се бори против Исламската држава да ја продолжи својата клучна мисија.

Блинкен денеска ќе се сретне со турскиот министер за надворешни работи Хакан Фидан.

НАТО сојузниците, Вашингтон и Анкара ги поддржуваа сириските бунтовници за време на 13-годишната војна во Сирија, но нивните интереси често се разминуваа кога станува збор за една од бунтовничките фракции, Сириските демократски сили (СДФ) предводени од Курдите.

СДФ е главниот сојузник во американската коалиција против Исламската држава. Таа е предводена од Единиците за заштита на народот, кои Анкара ги смета за продолжување на радикалната Курдистанска работничка партија (ПКК), која ја смета за терористичка организација и која е во конфликт со Турција 40 години.

Блинкен рече дека Исламската држава ќе се обиде да го искористи овој период за повторно да ги воспостави своите бази во Сирија, но САД се решени да не го дозволат тоа.

Администрацијата на американскиот претседател Џо Бајден најави нов пакет оружје за Украина, иако количината или содржината на пакетот не се откриени.

Портпаролот на Белата куќа Џон Кирби изјави дека САД ќе продолжат да испраќаат дополнителни пакети помош за Украина „до крајот на администрацијата на Бајден“.

Вашингтон пред десет дена соопшти дека ќе испрати проектили, муниција, противпешадиски мини и друго оружје во Украина во вредност од 725 милиони долари, додека администрацијата на Џо Бајден во заминување се обидува да го зајакне Киев во војната со Русија пред да ја напушти функцијата во јануари.

Пакетот, кој се испраќа под претседателското специјално овластување (ПДА) за што поскоро да се донесе оружје од американските залихи до првите линии на фронтот, се очекува да биде во вредност од околу 500 милиони долари и да вклучува муниција за ракетните системи ХИМАРС.

По вчерашното соопштение, околу 5,6 милијарди долари ќе продолжат да му бидат достапни на Бајден според системот ПДА без потреба од одобрување од Конгресот.

Руската војска зазема село по село на истокот на Украина како дел од обидот да го заземе индустрискиот регион Донбас, додека Русите ја гаѓаат енергетската мрежа на Украина со воздушни напади.