Поради бавниот напредок на вакцинацијата против Ковид-19, со оглед дека има недостиг на вакцини, француските и германските власти се обидуваат да ги уверат граѓаните дека вакцината на „Астразенека“ е исто толку безбедна како и другите.

Залихите на вакцини на британско-шведската компанија се неискористени во двете земји, што ја забавува борбата против пандемијата.

Во Франција биле употребени само 273.000 дози од вакцината на „Астразенека“, од 1,7 милиони примени до крајот на февруари, според Министерството за здравство.

Двете земји не ја одобрија вакцината за лица постари од 65 години, предизвикувајќи сомнеж за нејзината ефикасност во однос на ефикасноста на вакцините произведени од „Фајзер/Бионтек“ и „Модерна“.

Францускиот министер за здравство Оливие Веран, кој и самиот е лекар, беше вакциниран со вакцината во живо на телевизија за да ги увери граѓаните во нејзината ефикасност и безбедност.

Во Германија се повикуваат да се олеснат приоритетните списоци за вакцинација за да не пропаднат вакцините на „Астразенека“. До 23 февруари, 1,45 милиони дози на вакцината биле доставени во Германија, а искористени биле само 240.000.

Германската канцеларка Ангела Меркел задутре ќе се сретне со лидерите на 16 региони за да разговара за следните чекори во борбата против пандемијата. Во едно интервју минатата недела, Меркел ја пофали вакцината на „Астразенека“ како „доверлива вакцина“, повикувајќи ги Германците да не бидат пребирливи.

Но, таа нема да биде вакцинирана со таа вакцина, бидејќи има 66 години.

Германската комисија за вакцини – СТИКО, наскоро ќе објави нова препорака за вакцината, откако истражувањето покажа дека е ефикасна за старите лица, рече во петокот претседателот на комисијата, Томас Мертенс.

Криминалната организација „Камора“ во Неапол го регулира и превозот на пациенти и починати со приватни амбуланти возила, се вели во истражување спроведено од тимот на весникот „Фанпејџ“.

Приватна фирма за транспортни услуги на извесен Марко Салвати, со помош на „Камора“, обезбедила монопол за итен превоз на пациенти наплатувајќи ги услугите од десет до 20 пати повеќе од вообичаената цена.

Салвати на една мајка ѝ наплатил 500 евра за пренесување на нејзиниот болен син од куќата до болница, што предизвикало бес кај граѓаните во шпанските населби и тоа било причина весникот да почне сопствена истрага.

Со помош на скриени камери и тајно снимени разговори весникот го открил случајот на т.н. црн крст.

Во државната болница во Неапол, Салвати ја елиминирал конкуренцијата заканувајќи се со оружје, испраќајќи свои луѓе и поткупувајќи го болничкиот персонал, со цел себеси да си обезбеди работа, а весникот го документирал сето тоа.

Компанијата на Салвати спротивно на законот превезувалa починати од болница до домовите (законот дозволува починатиот да биде пренесен само на гробишта), а за таа услуга наплатувала и до 1.500 евра.

На оние што на крајот би одбиле или се побуниле поради високата цена на услугата тој им испраќал луѓе на мафијата за да ги премисли.

Советникот за регионална влада, Емилио Борели, претходно изјави дека станува збор за опасно учество во организиран криминал и го опиша сопственикот на приватниот бизнис, Марко Салвати, како лице што вознемирува и предизвикува проблеми, но дури и тоа не беше доволно за да се запрат неговите постапки.

Финската влада денеска прогласи вонредна состојба поради зголемувањето на бројот на новозаболени, а овој потег ќе им овозможи на властите да затворат ресторани и да преземат други мерки за да се спречи ширењето на коронавирусот.

Одлуката е донесена поради новите видови коронавирус, кои го забрзаа ширењето на инфекции во нордиската земја, која веќе ги затвори своите граници, пишува „Ројтерс“.

Вонредната состојба исто така ќе ѝ овозможи на владата да ги затвори училиштата и да го ограничи движењето меѓу регионите.

„Владата смета дека е потребно сите да имаме помалку контакти“, рече премиерката Сана Марин.

„Сега секој има шанса да влијае на тоа како ќе изгледаат пролетта и летото“, додаде таа.

Неколку фински региони забележаа брз раст на нови инфекции во последните две недели. Жешки жаришта беа создадени меѓу скијачите во Лапонија, работниците во бродоградилиштата и градежништвото.

Финска досега беше меѓу најмалку погодените европски земји од пандемијата.