Во Словенија, во последните 24 часа се потврдени 891 лице зарзено со коронавирус, што е за 340 случаи помалку од претходниот ден, објави владата, а поради подобрувањето на епидемиолошката состојба, ќе се дозволат храна и пијалоци на отворено во повеќето делови од земјата.

Во моментов во болниците има 642 пациенти со Ковид-19, од кои 150 се на интензивна нега, објавија официјалните служби.

Уште седум лица починаа како резултат на Ковид-19, со што бројот на смртни случаи во оваа земја се зголеми на 4142 лица.

Кампањата за вакцинација продолжува успешно, па според последните податоци на министерството за здравство, досега се вакцинирани 351.020 лица или 16,7 проценти, од кои 126.764 со обете дози.

Благодарение на подобрената епидемиолошка состојба по 11-дневното затворање, кое заврши во неделата, словенечката влада дозволи отворање тераси на ресторани во 8 од 12-те статистички региони.

Одлуката ќе важи од следниот понеделник и ќе трае најмалку до 25 април. Угостителите ќе можат да сервираат храна и пијалоци од 7 до 19 часот, во согласност со хигиенските и антиепидемиските услови и оддалеченост од 1,5 метар меѓу гостите и растојание од три метри помеѓу масите на отворените простории на нивните простории.

Угостителите, кои беа практично затворени од почетокот на минатата есен, не се задоволни од тоа и тврдат дека продолжувањето на угостителството, секторот кој претрпе најголема штета во епидемијата, треба да биде дозволено во целост.

Повторното отворање градини и тераси за угостители носи дополнителен оптимизам, рече државниот секретар во министерството за економија Симон Зајц, предупредувајќи ги угостителите дека од нив зависи колку ќе трае концесијата и ги повика строго да се придржуваат до пропишаните услови за работа.

Времето на посетата на претседателот на Русија на Србија ќе биде договорено многу брзо, веднаш штом епидемиолошката состојба го дозволи тоа, изјави портпаролот на Кремљ, Дмитриј Песков.

„Навистина постои актуелна покана до претседателот (на Русија) да ја посети Србија. Вие знаете дека претседателот високо ги цени нашите братски и партнерски односи и ваквите суштински, сериозни и заемно корисни односи за народите од двете земји. Секако, штом епидемиолошката состојба дозволи, датумите за таква посета ќе бидат договорени по дипломатски канали многу брзо“, одговори Песков на новинарско прашање за можноста за посета на Путин на Србија.

Српскиот амбасадор во Москва, Мирослав Лазански, во средата рече дека Србија се надева дека рускиот претседател Владимир Путин ќе дојде во Белград во мај, затоа што тогаш ќе се случи отворањето на Храмот на Свети Сава.

Претседателот на Србија, Александар Вучиќ, објави дека првите дози на руската вакцина „спутник В“ од институтот „Торлак“ ќе бидат пуштени во употреба помеѓу 5 и 10 јуни и додаде дека верува оти Србија самостојно ќе ја произведува вакцината пред крајот на годината, пренесува „Фонет“.

„Ќе видиме дали ќе го произведуваме „синофарм“ или „спутник“ до крајот на годината и се надевам дека ќе ги произведуваме двете вакцини до март, рече Вучиќ за време на неговата посета на „Торлак“ и изјави дека вкупното производство првично би било 20 милиони, а подоцна и 30 милиони дози годишно, за да се покријат и потребите на регионот.

Претходно беше објавено дека Србија може да започне со пакување на руската вакцина „спутник В“ од средината на годината, а да ја произведе до крајот на годината.