Заменик-шефот на руската администрација во окупираната област Херсон изјави дека референдумот за официјално присоединување кон Русија нема да се одржи додека не престанат борбите во тој регион, како и во блиските региони Одеса и Миколаев, пренесува Си-Ен-Ен.

Заменик-началникот на воената цивилна управа на Херсон, Кирил Стремусов, за Ројтерс изјави дека „во моментов нема да се зборува за референдум“.

„Подоцна ќе објавиме кога ќе се одржи некаков вид на гласање, но нема да биде денеска, ниту утре, бидејќи нашата прва задача е да воспоставиме ред и да го организираме системот на управа во тој регион“, додаде Стремусов.

Регионот во јужна Украина е под руска контрола од почетокот на инвазијата кон крајот на февруари.

Стремусов претходно рече дека проруските власти во Херсон ќе бараат руска воена база во регионот, додавајќи дека руската администрација ги продолжува плановите за воспоставување нов „банкарски систем“ кој ќе биде „целосно интегриран“ во рускиот систем.

Украинскиот претседател Володимир Зеленски во своето ноќно обраќање рече дека ослободувањето на Украина е се поблиску секој ден и дека е само прашање на време кога Украина ќе ги врати териториите што Русија ги окупира.

„Украина ќе врати се’. Ова е императив. Тоа е само прашање на време. Секој ден сме се поблиску до ослободувањето. Сè што правиме е за таа цел“, рече Зеленски.

„Ќе имаме повеќе оружје од Русија“

Ситуацијата во Донбас се уште е тешка, особено во областите Северодонецк, Лисичанск, Бакмут и Попасна, рече тој.

„Што се однесува до снабдувањето со оружје, секој ден сме се поблиску до тоа да го надминеме нашиот непријател. Ќе доминираме над окупаторот со технолошка и конвенционална ударна сила. Многу зависи од нашите партнери. Тие се подготвени да и’ обезбедат на Украина сè што и’ е потребно за да ја одбрани својата слобода. Затоа, очекувам добри вести за ова следната недела“, изјави украинскиот претседател.

Борбите за источниот украински град Северодонецк продолжуваат, а руските сили вршат напади, тврди Генералштабот на вооружените сили на Украина.

„Со употреба на артилерија, руските сили извршија операции во областа на градот Северодонецк“, се вели во соопштението на Генералштабот.

„Заканата од удар од белоруската територија врз украинските инфраструктурни објекти останува можност“, заклучуваат во објавата.