Големи дождови и поплави ја погодија Калифорнија и сушната Невада

Големо невреме ја погоди сојузната американска држава Калифорнија во северниот дел и сушната Невада, при што предизвика излевање на реките и паѓање на дрвја, евакуирани се жители, затворени училишта и патишта, а издадени се предупредувања за опасни лизгања на земјиште и одрони од планините.

Некои скијачки центри во калифорнискиот планински венец Сиера Невада затворени се и во вторник поради страв од лавини и прекин на струјата, а метеоролозите најавуваат дека доаѓа уште снег и дожд.

Кај градот Рино во Невада, националната гарда со амфибии им помагаше на жителите да се евакуираат.

За време на викендот дрвја паѓаа врз автомобили и куќи, блокираа патишта во заливот Сан Франциско, а спасувачите извлекуваа луѓе од автомобили на поплавените патишта.
Една жена загина во саботата кога врз неа паднало дрво додека шетала по голф-терен. Во познатата калифорниска винска област Напа реката ги поплави лозјата.
Реките во долината Сонома северно од Сан Франциско и во Рино, Невада исто така се излеаја, а надлежните велат дека со денови може да бидат со високо ниво на водостој.
Најтешко погодена област е индустрискиот кварт со магацини во градот Спаркс покрај Рино.

Главен приоритет на властите им е да ги направат патиштата проодни и евакуираните граѓани да се вратат дома.

Еден жител на Спаркс вели дека не очекувал толку дожд во Невада, земја во која годишно паѓаат 20 сантиметри дожд.

Евакуирани се околу 1.300 жители од 400 куќи, во Рино, каде реката Траки се излеа.
Училиштата во Окригот Сонома се затворени, каде исто така луѓето се евакуирани, а илјадници домаќинства останаа без струја.

Јужно, поблиску до Лос Анџелес, возачите се предупредени од можни поплави и лизгање на земјиште во планините.

Во Калифонискиот државен парк, паднала џиновска секвоја, позната по огромниот тунел за запрежни коли, просечен во неа пред половина век, јави San Francisko Chronicle.
Двата главни автопата во планинскиот венец Сиера Невада делумно се затворени поради одрони, а патиштата кои водат до Националниот парк Јосемити се затворени поради страв дека може да се излее реката Мерсед./крај/мф