Во последните 24 часа во Словенија се регистрирани 1.439 нови случаи на коронавирус, а 27 лица починаа, објавено е на специјализираната веб-страница на владата. Вкупно се извршени 11.149 ПЦР и брзи тестови.

Во моментов, активни се 19.008 случаи, што е за 628 помалку од претходниот ден. Во моментов има 1.159 пациенти во болница, од кои 182 се на интензивна нега.

Од почетокот на пандемијата, во Словенија починале 3.248 лица. На крајот на декември во Словенија започна вакцинацијата против коронавирус, а досега се вакцинирани 47.931 лице.

Рускиот фонд за директни инвестиции (РФПИ) потпиша договор со водечки турски фармацевтски производител за производство на вакцината „спутник В“ во Турција и го започна процесот на пренос на технологија.

Потенцијалниот обем на производство е еден милион дози вакцина „спутник В“ годишно. Исто така се разгледува можноста за проширување на производството. Вакцината ќе биде доставена и на турскиот пазар и во други земји.

Турските партнери изразија голем интерес за вакцината „спутник В“, чијашто ефикасност е поголема од 90 проценти, со цел да го вакцинираат населението и да произведуваат за извоз во трети земји.

Вакцината „спутник В“ е направена врз основа на докажана и добро проучена платформа на човечки аденовирусни вектори и веќе доби одобрение за употреба во Русија, Белорусија, Аргентина, Обединетите Арапски Емирати, Унгарија, Србија, Боливија, Алжир, Палестина, Венецуела, Парагвај и Туркменистан.

Францускиот претседател Емануел Макрон им рече на своите колеги од Европската Унија дека Франција ќе ги направи ПЦР-тестовите задолжителни за сите патници во Франција, вклучително и другите земји на ЕУ, соопшти кабинетот на Макрон.

Прекуграничните работници и копнениот транспорт ќе бидат ослободени од таа обврска, додаде француското претседателство, пренесува „Ројтерс“.

Тестот ќе треба да се изврши најдоцна 72 часа пред поаѓањето, беше речено по видеосамитот на лидерите на ЕУ што се одржа во четвртокот.