Грчката Влада вети дека ќе ја заостри постапката за добивање азил за мигранти и ќе ја забрза депортацијата.

Ова се случува во време кога во земјата пристигнуваат сè повеќе мигранти по морски пат, според АП.

Предлог-законот беше доставен до парламентот и во него се некои од новините и построги критериуми за пристап до апликациите за азил и продолжен рок на притвор.

Наглото пристигнување на мигранти и бегалци во текот на летото, наводно, ги оптоварило грчките острови во близина на турскиот брег, каде што се наоѓаат повеќе од 25 000 азиланти и мигранти, главно во преполни кампови.

Поранешниот американски претседател Џими Картер (95) беше хоспитализиран откако падна во неговиот дом во Џорџија и ја скрши карлицата, што е негов трет пад во последните месеци.

Портпаролот на Картер, Дајана Конгилео, ја опиша неговата повреда како полесна и додаде дека Картер се чувствува добро, пренесува АП.

Несреќата се случила во понеделникот вечерта, а како што се наведува, Картер првпат паднал во рана пролет, кога морал да има операција на колкот, а вторпат паднал на почетокот од овој месец, кога добил 14 шевови, но сепак отпатувал на добротворен митинг во Нешвил.

Картер е најстариот поранешен претседател во историјата на САД, а тој и сопругата Розалин (92) се рекордери меѓу првите двојки со повеќе од 73 години брак.

Европската комисија ѝ даде на Хрватска зелено светло за влез во Шенген.

Одлуката би требала да биде објавена денеска, јави „Блумберг“, повикувајќи се на извори од Брисел.

За одлуката ќе расправа и Советот на Европа.

Претходно, хрватските европарламентарци ја повикаа ЕК да ја потврди подготвеноста на Хрватска за Шенген.