Дури и од притвор, опозиционерот Алексеј Навални е „трн во окото“ на рускиот претседател Владимир Путин.

Неодамна, неговиот тим ги објави резултатите од големата истрага што се однесуваше на богатството на Путин и и` овозможи на јавноста за првпат да ѕирне во палатата на Путин на Црното Море. Документарецот, објавен заедно со истражувањето, го погледнале 22 милиони луѓе за еден ден.

Истрагата содржи обвинувања за неконтролирана корупциска шема поврзана со, како што велат, имотот на Путин од 1,4 милијарди долари. Руските власти сето тоа го негираат.

„ Тоа е повторување на една стара приказна. Ако не се лажам, во 2017 или 2016 година, за првпат се појави приказната за таканаречената палата на Путин во Геленџик. Тоа не е точно. Нема палата, тој не поседува никаква палата” изјави портпаролот на Путин, Дмитриј Песков, пренесува Си-Ен-Ен.

Приказната за овој имот првпат се појави пред десетина години кога претприемачот Сергеј Колесников објави отворено писмо во кое го повика тогашниот претседател Дмитриј Медведев да престане со корупцијата што ја финансира изградбата на палатата.

Извештајот и двочасовниот документарец објавен од Антикорупциската институција (ФБК) на Навални нудат широк увид во палатата. ФБК тврди дека добиле детални цртежи на зградата од подизведувачите, како и список на купениот мебел и фотографии од примероците на подовите. Со помош на собрани документи и фотографии, тие изградија 3Д-модел на ентериерот.

„ Ова е како држава во држава со која управува вечен император“, рече Навални во документарниот филм. „ Направена е така што никој не може да пристапи до неа од копно, море или воздух. Илјадници луѓе кои работат во палатата имаат забрана да донесат дури и едноставен телефон со камера, но ние ќе ѕирнеме внатре“ вели Навални.

Истрагата на Навални тврди дека имотот има површина 39 пати поголема од областа на Монако, пишува Би-Би-Си.

Според плановите, самиот замок има 17.691 квадратни метри, и се состои од 11 спални соби, неколку дневни соби и сали, приватен театар, кино, казино, два базени, пекара и „валкани простории“ од непозната намена. Собите имаат мермерни подови и столбови, а ѕидовите се раскошно украсени, направени по кралските палати во Санкт Петербург. Тие се опремени со кадифе и богати теписи.

Посебен дел од извештајот е посветен на описите на неверојатно скапиот мебел направен по нарачка на луксузна италијанска марка. Меѓу споменатиот мебел се наоѓа маса во вредност од 56 илјади долари и тросед во вредност од 27 илјади долари.

Просторијата што ја нарекоа „најконтроверзна просторија во палатата на Путин“ е салон за наргиле со нешто што потсетува на „шипка за танц“.

Тимот на Навални тврди дека трошоците за изградба на палатата се искачија заради непрекинатите реновирања. Веднаш на почетокот имаше проблеми со вентилација и висока влажност, поради што беа оштетени многу делови од луксузниот ентериер на театарот и стаклена градина од 2.500 квадратни метри.

Претставничкиот дом на САД в понеделник ќе достави предлог до Сенатот за отповикување на поранешниот претседател Доналд Трамп, обвинувајќи го за поттикнување бунт.

На тој начин ќе започне судска постапка што може да ја „затвори вратата“ тој повторно да се кандидира на претседателските избори, изјави денеска лидерот на мнозинството во Сенатот, Чак Шумер.

„Претставничкиот дом ќе достави член за отповикување до Сенатот. Сенатот ќе спроведе судење за отповикување на Доналд Трамп. Ќе биде целосно судење. Ќе биде праведно судење”, рече Сумер во Сенатот, пренесува „Ројтерс“.

Лидерот на републиканците во Сенатот, Мич Меконел, предложи почетокот на судењето за отповикување на поранешниот претседател Доналд Трамп да се одложи за една недела или повеќе, за Трамп да има време да ја подготви својата одбрана. Сепак, Меконел им рече на своите републикански колеги дека краткото одложување ќе му даде време на Трамп да го подготви и состави неговиот правен тим, што ќе обезбеди правично судење.

Процесот пред Претставничкиот дом ќе го водат девет менаџери за отповикување кои редовно се состануваа за да разговараат за стратегијата.

Демократите се надеваат дека ќе го водат процесот, притоа носејќи закони кои се приоритет за Бајден, вклучително и олеснување поради пандемијата на коронавирусот, но за тоа им треба одредена соработка од републиканските сенатори. Демократите велат дека постапката треба да се одвива брзо, бидејќи сите биле сведоци на опсадата, додека многумина избегале поради загрозената безбедност додека бунтовниците упаднале во Конгресот.

Претставничкиот дом го отповика претседателот во заминување една недела подоцна, а десет републиканци гласаа за отповикување на Трамп.

Околу илјада луѓе во Шведска примиле вакцина на „Модерна“ која се чувала на погрешна температура за време на транспортот, објави шведска компанија задолжена за доставување на вакцината.

Вкупно 2.100 дози на вакцината, околу 20 проценти од количината што Шведска ја доби досега од „Модерна“, се чуваат на премногу ниска температура, а дозите што не се користени се издвојуваат сè додека не се утврди нивната ефикасност, објави „Апотекет“.

Сите што ја примиле вакцината од неисправната пратка се здравствени работници.

„Според првата проценка на шведскиот здравствен орган, нема индикации дека дозите транспортирани на прениска температура претставуваат ризик“, соопшти „Апотекет“.

Но, шведскиот здравствен орган и државната фармацевтска компанија вршат понатамошни истражувања, изјави портпаролот на „Апотекет“, Магнус Фриск.

„Сè уште треба да откриеме дали дадената доза на вакцината ќе делува“, додаде тој.

Фриск истакна дека ја контактирале „Модерна“ за повеќе информации за ефективноста на дозите што се одржуваат на премногу ниска температура и дали оние што ги примиле треба да добијат нова доза на вакцина.

Од 17 јануари Шведска вакцинираше 146.000 луѓе, претежно со вакцината „Фајзер“/„БиоНТех“.