Албанскиот премиер, Еди Рама, го потврди постоењето на мапа во врска со промената на границите на Западен Балкан, пренесува Газета Експрес.

„Разговарав со него (Јанез Јанша) многу одамна. Исто така, го имам видено документот што беше објавен. Немам коментар“, рече Рама во емисијата „Избори 2021″.

Во четвртокот, словенечкиот портал Нецензурирано.си објави документ, кој наводно предлага ревизија на границата меѓу Косово и Србија, обединување на Косово без северниот дел со Албанија, обединување на делови од Црна Гора и Македонија каде мнозинството е албанско население со Албанија, можноста за отцепување на Република Српска од Босна и Херцеговина и нејзино обединување со Србија, како и обединување на делови од западна Босна со Хрватска.

Европската унија повеќе пати повтори дека тие не знаат за таков документ.

Словенечкиот премиер, Јанез Јанша, чија земја ќе претседава со Европската унија во втората половина на оваа година, изјави дека тврдењата за постоење на тој документ се насочени кон нанесување штета на Словенија во ЕУ.

„Словенија сериозно бара решенија за развој на регионот и европската иднина за земјите од Западен Балкан и ваквите пишувања се обидуваат да ја спречат оваа цел“, објави Јанша на социјалните мрежи.

Тој вчера изјави дека не постои документ со кој Словенија би се залагала за промена на границите на Балканот.

Копија од наводниот документ беше објавена на англиски јазик од словенечкиот портал, но без да се објасни кој го составил и на кого бил упатен, пишуваат агенциите од регионот.

Русија воведе забрана за влез на високи претставници на САД. Меѓу нив се и јавниот обвинител Мерик Гарланд и министерот за домашна безбедност Алехандро Мајоркас, соопшти руското Министерство за надворешни работи.

Покрај двајцата членови на администрацијата на претседателот Џо Бајден, има уште шест лица на списокот на кои им е забранет влез во Русија.

Меѓу нив се директорот на ФБИ, Кристофер Вреј, директор на Националната управа за разузнавање (ДНИ) Аврил Хаинс и Сузан Рајс, која е претседател на Советот за внатрешни работи.

Руското министерство го стави на списокот и шефот на Федералниот затвор, Мајкл Карвахал.

На списокот се и поранешниот шеф на ЦИА, Ар Џејмс Вулси Џуниор и Џон Болтон, кој беше советник за национална безбедност на поранешниот американски претседател, Доналд Трамп.

Во соопштението на руското Министерство за надворешни работи се вели дека сите овие луѓе биле вклучени во развојот и спроведувањето на антируска политика во САД, објави новинската агенција ТАСС.

На поранешниот перуански претседател Мартин Визкара (58) забрането му е да врши јавна функција во следните десет години, бидејќи минатата година се вакцинира против коронавирус преку ред.

Перуанскиот конгрес му ја изрече забраната на Визкара, кој ја водеше земјата од 2018 до 2020 година, кога ја прими вакцината против коронавирус од кинескиот производител „Синофарм“.

Визкара нема да може да го заземе местото во парламентот што го освои на изборите минатата недела. Вакцината ја прими уште додека беше претседател.

Покрај Визкара, забрана од една година доби поранешната министерка за надворешни работи Елизабет Астет, а забрана за вршење јавна функција од осум години доби поранешната министерка за здравство Пилар Мацети.

Скоро 500 политичари и државни службеници се вмешани во скандалот со вакцинацијата.