Српската војска денеска ги претстави новите хеликоптери купени од Русија, а на церемонијата на воениот аеродром во Батајница кај Белград присуствуваше и српскиот претседател Александар Вучиќ, кој ја оцени набавката како значително засилување на перформансите на српската армија.

Вучиќ рече дека новите хеликоптери „ми-35“, „Х145М“ и „ми-17“ се набавени затоа што тоа го овозможила значително подобрата состојба во државниот буџет, а исто така истакна и дека биле купени со добар попуст и олеснувања овозможени за Србија од руска страна, пренесе „Индекс“.

Тој им се заблагодари на како што кажа, руските пријатели, велејќи дека станува збор за моќни машини и најсовремени европски и руски хеликоптери, кои многумина ги нарекуваат „ѓаволски кочии“, но нагласи дека овие воени летала ќе се користат како чувари на Србија.

„Кога ќе погледнете како изгледаат овие машини, ви станува јасно зошто за нив се вели дека се страв и трепет и зошто некои ги нарекуваат ѓаволски кочии. За нас, тие се чувари на нашата земја и небо“, нагласи српскиот претседател.

Русија ги испорача хеликоптерите неколку месеци пред рокот, а во Белград беа транспортирана со товарен авион на руската армија два дена пред средбата на Вучиќ со рускиот претседател Владимир Путин во Сочи на 4. декември.

Италијанскиот десничарски опозиционер, Матео Салвини, се закани дека ќе ја бојкотира „Нутела“, бидејќи нејзините состојки не се сто проценти италијански.

„Се премислив затоа што дознав дека ‘Нутела’ содржи лешници од Турција, па повеќе би сакал да им помогнам на компании кои користат италијански производи“, изјави Салвини на еден јавен собир.

„Повеќе би јадел италијански производи ако со тоа можам да им помогнам на италијанските земјоделци“, додаде 46-годишниот политичар.

Салвини сака јавно да ги истакнува своите прехранбени навики како дел од неговата стратегија на социјалните мрежи. „Нутела“ честопати досега ја истакнувал на фотографии со храна на своите профили на „Твитер“ и „Фејсбук“.

Во видео на „Фејсбук“, тој ги повика „Фереро“ и другите локални компании за храна да набават италијански шеќер, лешници и млеко.

Производителот на „Нутела“ не одговори на забелешките на Салвини. „Фереро“ е најголемиот купувач на лешници во светот, а како што се тврди, количината на лешници во Италија не е доволна за да се задоволат потребите за производство на кремот „Нутела“.

САД и Иран денеска разменија затвореници, при што секоја страна ослободи по едно лице, што претставува редок чин на дипломатска соработка меѓу двете земји, по повеќемесечните тензии.

Студент на постдипломски студии на американскиот Универзитет Принстон е ослободен во Иран, во замена за ирански научник кој е задржан во САД.

За време на размената, која е извршена во Цирих, ирански официјални претставници го предадоа американскиот студент со кинеско потекло Сијуе Ванг, кој беше во притвор во Техеран од 2016 година, во замена за научникот Масуд Солејмани, кој беше осуден во сојузната американска држава Џорџија.

Набрзо се огласи и американскиот претседател, Доналд Трамп, потврдувајќи дека Ванг е ослободен и се враќа во САД.

„Ванг беше затворен од август 2016 година под изговор дека вршел шпионажа. Им благодариме на швајцарските партнери за помошта во преговорите за ослободување на Ванг од Иран“, нагласи Трамп.

Солејмани, пак, кој работи на истражување на матични клетки, хематологија и регенеративна медицина, бил уапсен од американските власти под обвинение дека ги прекршил трговските санкции, обидувајќи се во Иран да пренесе биолошки материјал.