Секоја навремена и брза испорака на воени пакети во Украина има позитивен ефект на фронтот, а секое одложување води кон негативни последици, изјави претседателот на Украина, Володимир Зеленски, на средба со делегација американски конгресмени.

„Секое доцнење на воените испораки има свои негативни последици на фронтот. Ги информирав американските конгресмени за актуелната состојба и перспективите“, нагласи Зеленски во вечерашното обраќање до нацијата, пренесува Укринформ.

Според Зеленски, клучно е сите, особено земјите како Соединетите Американски Држави, брзо да ги спроведат потпишаните договори.

„Важно е на сите нивоа партнерите да бидат целосно информирани за нашите потреби, за нашите позиции“, нагласи претседателот на Украина.

Тој апелираше до американскиот претседател Џо Бајден и американскиот Конгрес за двопартиска поддршка од почетокот на војната.

„Ви благодариме што донесовте многу важен закон во Конгресот. Се надевам дека сето тоа ќе стигне до Украина што е можно поскоро и ќе ја зајакне нашата армија. И ние сме им благодарни на сите Американци што ја поддржуваат нашата земја“, рече Зеленски.

Тој потсети дека во блиска иднина планира лично да му го претстави планот за победа на Украина на американскиот претседател Џо Бајден и на претседателските кандидати на Републиканската и Демократската партија.

Како што изјави Зеленски, на средбата се разговарало за клучните области на натамошната американска помош во областа на безбедноста и одбраната.

„Приоритет е да се добијат дополнителни системи за противвоздушна одбрана, ракети за нив и дозвола за употреба на оружје со долг дострел за воени цели на територијата на Руската Федерација“, заклучи претседателот на Украина.

Унгарскиот премиер Виктор Орбан на Фејсбук објави видео на кое го вози американскиот актер и поранешен гувернер на Калифорнија Арнолд Шварценегер во фитнес центар во Будимпешта, шегувајќи се дека туристите во градот повеќе ја знаат американската ѕвезда од него.

На видеото се гледа како Шварценегер го возат до зградата на унгарската влада, а потоа тој и Орбан пријателски се поздравуваат, разменуваат книги со посвети, а актерот се фотографира на масата во кабинетот на унгарскиот премиер. После тоа одат во теретана, а зад воланот бил самиот Орбан.

„Сега забележаа кој си. Тие не знаат кој сум јас, бидејќи странците те знаат тебе, а не мене. Не знаат кој сум, но тебе те препознаа“, рече Орбан додека автомобилот минуваше покрај туристичкото шеталиште.

Орбан претходно објави фотографија од заеднички тренинг со Шварценегер во фитнес центар во Будимпешта.

„Ја оставив маицата за тренинг дома, но тренерот немаше милост“, напиша Орбан на Фејсбук.

Шварценегер го посети истиот фитнес центар во 2018 година на снимањето на „Терминатор: Темна судбина“ во Будимпешта.

Германскиот канцелар Олаф Шолц ја отфрли можноста за испорака на прецизно оружје со долг дострел на Украина во иднина, без оглед на одлуките на партнерите во Алијансата, пренесува „ДПА“.

На денешната средба со граѓаните во Пренцлау во источната германска покраина Бранденбург, Шолц го повтори своето противење на испораката на крстосувачки ракети Таурус, велејќи дека тоа би значело висок ризик од ескалација на украинскиот конфликт.

Крстосувачките ракети Таурус, со дострел од околу 500 километри, на домет би ја имале и Москва.

„Реков не“, потврди Шолц.

„И, се разбира, ова важи и за други оружја, доколку ги испорачавме, кои би можеле да стигнат до оваа голема далечина“, рече канцеларот.

„Така ќе остане дури и ако другите сојузнички земји решат поинаку“, додаде.

Украинскиот претседател Володимир Зеленски веќе извесно време ги притиска западните сојузници да им снабдат оружје со долг дострел за да можат да ги нападнат руската логистика и аеродромите на воздухопловните сили далеку зад линиите на фронтот, на руска територија.

Оружјето со најдолг дострел што го испорачува Германија е ракетниот фрлач Марс II, кој може да погоди цели оддалечени 84 километри.

Партнерите на НАТО, САД, Велика Британија и Франција испорачаа крстаречки ракети со дострел до 300 километри.

Во моментов, во тек е дискусија за тоа дали да се одобри употребата на ова оружје против цели на руска територија. САД и Велика Британија во моментов се двоумат околу таа одлука, а Русија веќе се закани дека таквата одлука би значела директен конфликт меѓу НАТО и Русија.