Свет
ЕУ-бирократите ја изгласаа цензурата на интернет
Одборот за законодавство на Европскиот парламент го изгласа новиот закон за авторски права кој може да го уништи интернетот, а најспорните делови во реформата на авторски права се член 11 и член 13, на кои се противеа дури и членовите на ЕП, пренесува порталот „Некст веб“.
Членот 11 ги опфаќа помошните авторски права и т.н. даноци на линкови, што значи дека која било страница што објавува исечоци од новинарски онлајн-содржини мора прво да добие лиценца од издавачот. Тоа се однесува на социјалните мрежи што со линковите објавуваат и слики и резимеа, но и на други интернет-страници, како агрегатори на вести, апликации за вести или страници за проверка на факти.
Член 13 т.н. машина за цензура ја пренесува одговорноста за контролирање на употребата на авторските содржини на индивидуални веб-страници воведувајќи ја идејата за автоматизиран филтер за содржини кој би забранил споделување на популарните мемиња, но и цитати од „Википедија“ и други работи што се вообичаен дел од интернет-комуникацијата.
На пример, страниците на кои корисниците испраќаат фотографии мора да ги скенираат сите тековни и идни фотографии и да проверат дали има кршење на авторските права. Тоа ќе важи и за музиката што ќе биде пуштена без авторски права на „Јутјуб“, што значително ќе ја измени работата на оваа видеоплатформа.
Член 13 не предвидува правни санкции за проблеми што може да произлезат од неуспехот на автоматските филтри, што го иницира прашањето како ќе се реши проблемот со неправилното отстранување содржини од интернет.
Оваа одлука не значи дека сè е готово и дека новиот закон ќе стапи во сила. Таа го потврдува ставот на ЕП за реформа на авторските права, но противниците на реформите може да побараат пленарна седница на која ќе бидат присутни и ќе гласаат сите 751 пратеник. Затоа веќе е почната кампања да се одржи ваква пленарна седница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Клучот е кај родителите, тие мора да одговорат на едно прашање“, вели поранешен шеф на белградската полиција за случајот со исчезнувањето на Данка
Родителите се тие кои имаат многу да објаснат. Прво, зошто чекаа да го пријават исчезнувањето? Колку што знам, чекаа два часа. Познато е дека кога ќе исчезне дете, веднаш се пријавува за да се реагира брзо, изјави за Телеграф.рс Марко Ницовиќ, поранешен началник на белградската полиција.
Според Ницовиќ, полицијата оди во добра насока, бидејќи ја чешла секоја педа од земјата, но се надеваат и дека темелно се проверуваат граничните премини, бидејќи не ја исклучуваат можноста за киднапирање.
– Би можело да биде се, не е исклучена никаква можност. Ако мајката рече дека го оставила девојчето на минута, го поставуваме прашањето каде би можело да оди двегодишното дете? Колку далеку, без мајка му да го најде? Второ, зошто чекаа два часа? Има простор и за киднапирање, а знаеме дека границата е блиску, но и за многу повеќе. Отворени се многу прашања и останува да се почека истражните органи да си ја завршат работата, вели Ницовиќ за српски Телеграф.
Да потсетиме, потрагата по двегодишната Данка Илиќ влезе во четврти ден. Во потрагата од утрово се вклучени уште 18 пожарникари и кучето Зиги.
Багери вчера цел ден копаа и вадеа ѓубре и шут од куќата, а пред куќата каде последен пат беше видена исчезнатата Данка по која трага цела Србија пристигна тешка механизација која ќе продолжи да работи денес за да се расчисти теренот.
Свет
Во Таџикистан се уапсени девет лица поврзани со масакрот во Москва
Таџикистан уапси девет лица осомничени дека се поврзани со масовното пукање во руската концертна сала минатиот петок, како и милитантна исламистичка група која ја презеде одговорноста за нападот, изјави таџикистански безбедносен извор за Ројтерс. Четворицата осомничени напаѓачи зад најсмртоносниот напад во Русија во последните 20 години се државјани на Таџикистан. Тие беа уапсени со уште седум други осомничени, од кои некои исто така потекнуваат од поранешната советска централноазиска земја.
Одборот за државна безбедност на Таџикистан приведе девет лица во градот Вахдат. Осомничените сега се во главниот град Душанбе, рече изворот, но не даде детали. Најмалку 143 лица загинаа во напад на концертна сала во близина на Москва.
Таџикистан, член на безбедносниот блок предводен од Русија и дом на руската воена база, ги собра семејствата на осомничените напаѓачи за да можат да бидат испрашани од руските истражители во Душанбе, изјавија извори за Ројтерс.
Исламска држава ја презеде одговорноста за нападот во концертната сала, а американските официјални лица рекоа дека имаат разузнавачки информации кои укажуваат на тоа дека нападот го извршил авганистанскиот огранок на мрежата, Исламската држава Хорасан (ИСИС-К).
Руските истражители вчера објавија дека пронашле докази дека напаѓачите се поврзани со „украински националисти“. САД веднаш го отфрлија тврдењето како неоснована пропаганда. Киев остро негираше каква било вмешаност во нападот на концертната сала.
Регион
Нов силен земјотрес ја погоди Грција: се стресе на Крит
Нов земјотрес со јачина од 3,7 степени според Рихтеровата скала ја погоди Грција, соопшти ЕМСЦ.
Земјотресот е регистриран на Крит, на 62 километра од Ираклион, на длабочина од 16 километри.
Земјотресот е регистриран во 12.37 часот по локално време.
Засега нема информации за повредени или материјална штета.
Грција утрово ја погоди силен земјотрес со јачина од 5,7 степени според Рихтеровата скала по што следеа афтершокови.