Турскиот претседател Реџеп Таип Ердоган потврди дека Турција го тестирала системот за противвоздушна одбрана С-400 што го купила од Русија, додавајќи дека забелешките на САД во врска со ова прашање се неважни.

Вашингтон тврди дека набавката на руски системи С-400 од страна на Турција ја компромитирала одбраната на силите на НАТО и се закани со санкции кон Анкара.

Турските вооружени сили го тестираа С-400 на северот од земјата, во близина на градот Синоп, од 13 до 17 октомври, што предизвика лута реакција од Вашингтон, пренесува РИА Новости.

Во Босна и Херцеговина денеска се потврдени 1.179 нови случаи на коронавирус, што е нов дневен рекорд и за првпат од избувнувањето на епидемијата во март, бројот на новозаболени во оваа земја е поголем од илјада.

Во последните 24 часа тестирани се нешто помалку од три илјади примероци, а вирусот е потврден кај 732 лица од Федерацијата БиХ и кај 437 од Република Српска. Десет заболени се од областа Брчко. Починале 14 лица.

Бројките потврдуваат дека поголемите градови сè уште се местата каде што инфекцијата е најраспространета, со 209 нови случаи потврдени во Сараево, 129 во Бања Лука и 102 во Мостар.

Поради постојаното влошување на епидемиолошката состојба во РС, наскоро ќе бидат воведени дополнителни ограничувања, но засега, опцијата за целосно затворање е исклучена.

Во Словенија во последните 24 часа се потврдени 1.656 нови случаи на коронавирус, нешто помалку од претходниот ден. Бројот на хоспитализирани лица и бројот на смртни случаи продолжува да расте, поради што Владата вчера донесе одлука за привремено „заклучување“ што ќе трае најмалку една недела.

Бројот на нови случаи во последните 24 часа е нешто помал од претходниот ден, кога имаше рекордни 1.663, но процентот на позитивни тестови повторно е многу висок – 24,6 проценти.

Вкупниот број на заболени од почетокот на епидемијата во Словенија е 19.307. Активни се 11.434 случаи, 394 лица се лекуваат во болница, од кои 67 се на интензивна нега, соопшти Министерството за здравство.

Бројот на смртни случаи е, исто така, зголемен во споредба со вчерашните 210, па сега има 214.

Поради загрижувачкиот раст на бројот на заразени, словенечката влада минатата недела прво прогласи делумна „блокада“ во епидемиолошки „црвените“ региони, а вчера ограничувањата беа засилени, па поголемиот дел од јавниот живот ќе биде запрен следната недела, како и дел од економските активности низ целата земја.

Премиерот Јанез Јанша вчера изјави дека владата донела одлука сите ресторани, хотели и трговски центри да бидат затворени најмалку една недела, со исклучок на оние што ги нудат потребните прехранбени производи, градежни и технички материјали.

И студентските домови и повеќето градинки се затворени, а јавниот превоз ќе работи со третина од капацитетот.

Затворањето важи и за повеќето спортски активности како и за козметичките и фризерските салони.

Повеќето од новите ограничувачки мерки стапуваат денеска на сила. Забраната за напуштање на подрачјето на родните региони сè уште важи, а владата најави дека ќе го забрани и движењето надвор од матичните општини доколку сегашните ограничувања не функционираат.