Рускиот претседател Владимир Путин денес ја одобри новата влада во земјата во која остануваат повеќе министри од претходниот мандат, но со нов министер за економија и нов прв вицепремиер.

Новата влада е формирана по помалку од седум дена откако Путин откри големи промени во политичкиот систем што доведоа до оставка на тогашниот премиер Дмитриј Медведев и целата негова влада.

По оставката, Медведев беше именуван за заменик-претседател на Советот за безбедност, тело кое го води Путин.

Потоа, Путин го избра 53-годишниот Михаил Мишустин, поранешен шеф на даночната служба, за нов премиер на Русија. Економскиот советник на Путин од 2013 година Андреј Белошов ќе биде новиот прв вицепремиер, а нов министер за економија ќе биде поранешниот регионален гувернер Максим Решетников.

Официјални лица од здравствените власти го потврдија првиот случај на мистериозниот корона вирус во САД, кој уби шест луѓе во Кина, а стотици се заболени.

Портпаролот на Белата куќа одбил да даде коментар и ги упатил новинарите до Центарот за контрола и спречување болести (ЦДЦ). Си-ен-би-си објави дека и од таму не добиле одговор.

„Ројтерс“ објави дека кај патник од Кина во Сиетл бил дијагноситициран вирусот. Официјална потврда за случајот се очекува попладнево на брифинг во ЦДЦ, пренесе Си-ен-ен.

Освен во Кина, заболени од вирусот има во Тајланд, Јужна Кореја, Јапонија и Тајван.

Светската здравствена организација (СЗО) утре ќе одржи состанок со експерти за да разгледаат дали вирусот е глобален здравствен итен случај и дали треба да биде прогласена вонредна состојба.

Последен пат СЗО прогласи глобален здравствен итен случај во 2019 година поради еболата во источен Конго, од која починаа над 2.000 луѓе. Вонредна состојба беше прогласена и за вирусот Зика во 2016 година, за свинскиот грип „Х1Н1“ во 2009 година и за појавата на детска парализа и ебола во 2014 година.

Кинеските власти велат дека многу од пациентите со новата болест дошле во контакт со пазарите со морска храна, посочувајќи дека вирусот се шири од животни на луѓе. Сепак, здравствените власти велат дека вирусот се пренел и од човек на човек преку блиски контакти.

ЦДЦ соопшти дека луѓето можат да се заштитат од вирусот со миење на рацете со сапун и вода, да избегнуваат допирање на очите, носот или устата и да се држат настрана од болни луѓе. Многу луѓе во Кина купиле маски за лице за да се заштитат од вирусот.

Папата Франциско испрати писмена порака за да ги потсети делегатите на годинешниот Светски економски форум во Давос на моралната обврска да ги стават луѓето, наместо обичната борба за моќ или профит, во срцето на јавната политика.

Тој вели дека форумот дава можност за арена во која политичката волја и меѓусебната соработка можат да бидат водени и зајакнати со надминување на изолационизмот, индивидуализмот и идеолошката колонизација кои, како што наведува, за жал карактеризираат голем дел од нашата современа дебата.

Папата Франциск, исто така, побара зајакнување на солидарноста со оние што страдаат од социјална или економска нееднаквост и чија егзистенција е загрозена.

На форумот во Давос што почна денес, папата го претставува ватиканскиот кардинал.