Актерот и комичар Володимир Зеленски победи на претседателските избори во Украина, јавува „Асошиетед прес“ повикувајќи се на излезна анкета што ја спроведоа Киевскиот институт за социологија и Центарот за испитување на јавното мислење „Разумков“.

Зеленски во вториот круг освои 73,2 отсто од гласовите, а актуелниот претседател Петро Порошенко 25,3 отсто.

Анкетата е заснована на повеќе од 13.000 одговори на прашања лице в лице на 300 гласачки места, два часа пред затворањето на избирачките места. Авторите на анкетата тврдат дека границата за грешка е три отсто.

41-годишниот Зеленски, кој игра фиктивен претседател во популарно ТВ-шоу, вети дека ќе стави крај на војната во источниот регион Донбас и ќе ја искорени корупцијата.

Зеленски доби двојно повеќе гласови од Порошенко во првиот круг на гласање пред три недели.

Министерството за надворешни работи на Шри Ланка соопшти дека е потврдена националноста на 11 жртви во денешните терористички напади, а девет странци се водат за исчезнати.

Меѓу жртвите три се од Индија, еден од Португалија, две жртви се од Турција, три од Велика Британија и двајца со двојно државјанство на САД и Велика Британија.

Меѓу жртвите има и државјани на Холандија и на Кина.

Во серијата бомбашки напади во три цркви и четири хотели во Шри Ланка загинаа најмалку 200 луѓе, а ранети се 450.

Лидерот на главната опозициска Републиканска народна партија во Турција е нападнат додека присуствувал на погребот на војник, кој загинал во борбите против припадниците на забранетата Курдска работничка партија (ПКК).

На видеоснимки се гледа како Кемал Киличдароглу е удрен најмалку двапати, а обезбедувањето се обидува да го извлече од насобраниот народ.

Тој успеал да го напушти местото и да влезе во најблиската куќа. Гневните граѓани потоа се собрале пред куќата извикувајќи „Надвор ПКК“.

„Сите се исплашивме поради инцидентот. Кемал Киличдароглу е добро. Однесен е на безбедно“, истакна републиканскиот пратеник Левент Гок за „Хабертурк ТВ“.

Републиканската народна партија победи на изборите во Анкара и Истанбул.