Полицијата во Белград утрово успеа да ги растера демонстрантите кои од синоќа протестираа по најавата на претседателот на Србија Александар Вучиќ за нов полициски час поради порастот на бројот на заразени од новиот коронавирус.

Полицијата користеше специјални сили за разбивање демонстрации, полицајци на коњи, во оклопни возила и голем број лица во цивил.

Пред Парламентот синоќа се собраа неколку илјади граѓани, кои скандираа „Србија стана“ и „Уапсете го Вучиќ“. Демонстрантите фрлаа запалени факели, а во еден момент успеааја го пробијат полицискиот кордон и да влезат во холот на Парламентот, но беа одбиени со солзавец. Зградата ја чуваа стотици полициски специјалци, кои се обидуваа да ги спречат демонстрантите да упаднат во Парламентот.

Претседателот Вучиќ во обраќање синоќа рече дека состојбата со епидемијата е критична и најави заострување на мерките, меѓу кои и воведување на полициски час во земјата од петок до понеделник. Во Србија во изминатите 24 часа беа забележани 13 смртни случаи од Ковид-19, најмногу од почетокот на епидемијата, а во изминатите денови бројот на новозаразени постојано расте.

За попладнево е закажан нов протест.

Од денеска стапува на сила забраната за собирање на повеќе од пет лица, во затворен простор и на отворено, стапува на сила денеска во Белград, а полицискиот час од петок до понеделник.

Светската здравствена организација (СЗО) предупреди дека епидемијата на коронавирус се забрзува и дека се појавуваат докази за пренесување на Kовид-19 преку воздух, откако 239 меѓународни експерти предупредија за ваквиот начин на заболување.

„Признаваме дека се појавуваат докази во оваа област и затоа треба да бидеме отворени за таа можност и да ги разбереме импликациите“, рече Бенедета Алегранци, една од водечките фигури во СЗО на видеоконференција.

„Можноста за пренесување на вирусот преку воздух на јавни места, особено ако се преполни, не може да се исклучи. Сепак, доказите мора да се соберат и толкуваат“, предупреди Алегранци, препорачувајќи ефикасна вентилација и проветрување на затворените простории и физичко растојание.

„Тогаш кога тоа не е можно, препорачуваме да носите маска“, додаде Алегранци.

Повеќе од 200 меѓународни научници ги повикаа СЗО и меѓународната медицинска заедница да ја признаат можноста дека вирусот се пренесува преку воздух во статија објавена во списанието Clinical Infectious Diseases на Оксфорд.

СЗО веќе беше критикувана дека задоцнила со препораките за носење маски, а сега е обвинета и затоа што одбива да ги разгледа сè поголемиот број индикатори за пренесување на вирусот преку воздух.

„Епидемијата се забрзува и сè уште не го достигнавме врвот на пандемијата“, предупреди генералниот директор на СЗО, Тедрос Аданом Гебрејесус.

„Се чини дека бројот на жртви се стабилизира на глобално ниво, а во реалноста некои држави постигнаа значителен напредок во намалувањето на смртноста, но во други бројот на починати се зголемува“, рече тој.

Претседателот на Бразил, Жаир Болсонаро (65), има коронавирус, пренесува бразилскиот Си-ен-ен.

„Тестот покажа дека сум позитивен“, рекол Болсонаро со маска на лицето пред новинарите, додавајќи:

„Само погледнете во моето лице, добро сум“. Тој ја тргнал маската и продолжил да разговара со новинарите.

“Just look at my face: I’m fine,” Bolsonaro says, taking off his mask in front of journalists after announcing he has just tested positive for coronavirus pic.twitter.com/JIHHcjniPl

— Tom Phillips (@tomphillipsin) July 7, 2020

Болсонаро го релативизираше коронавирусот во текот на пандемијата, не се придржуваше до физичко растојание, дури и откако Бразил стана втората најпогодена земја од коронавирусот по САД, со повеќе од 65.000 смртни случаи и над 1.6 милиони потврдени случаи, пренесува Си-ен-ен.

Бразил ги потврди првите жртви на коронавирусот во март, а Болсонаро тогаш се шегуваше за вирусот. Тој рече дека ќе го надмине тоа како обична настинка затоа што порано бил голем спортист.

Оттогаш, пишува Си-ен-ен, Болсонаро продолжи да ги крши сите мерки против коронавирусот, учествувајќи на политички собири. Тој честопати ја носел маската на целосно погрешен начин или воопшто не ја носел.

Позитивниот тест за коронавирус на Болсонаро доаѓа само три дена откако тој ручал со американскиот амбасадор Тод Чепман. Никој не носел маска на тој собир.