Во овој театар на апсурдноста, постои можност на ЕУ да ѝ треба нуклеарна Украина, изјави портпаролката на руското Министерство за надворешни работи Марија Захарова.

Како што наведе таа, за тоа сведочи отсуството на реакција на ЕУ на изјавите на официјален Киев дека земјата треба да добие нуклеарен статус.

„Имајќи предвид дека луѓе како (германската министерка за надворешни работи) Анален Бербок се на власт во земјите од Европската унија, не ја исклучувам можноста дека ќе им треба и нуклеарна Украина во тој театар на апсурдот. Тие зборуваа за тоа. Во последниот случај, тие не го опоменаа Зеленски кога кажа такви глупости на конференцијата во Минхен“, истакна Захарова.

Таа се осврна и на изјавата на министерот за надворешни работи на Литванија, Габриелус Ландсбергис, кој повика на распоредување нуклеарен чадор на НАТО над Украина.

„Тоа е земја која, ми се чини, не придонела со ништо кардинално важно или исклучително актуелно во решавањето на кое било прашање поврзано со нуклеарната безбедност. Барем јас не сум свесна за тоа. Сепак, таквите празни зборови не остануваат незабележани“ изјави Захарова.

Оперативците на Службата за државна безбедност на Азербејџан го уапсија Араик Харутјуњан, поранешен лидер на регионот Нагорно-Карабах, објави азербејџанската новинска агенција АПА.

Агенцијата вчера објави и дека азербејџанските безбедносни сили уапсиле двајца поранешни водачи на Нагорно-Карабах, Аркадиј Гукасјан и Бак Сакјан, како и Давит Ишкањан.

Минатата недела азербејџанските власти објавија апсење на поранешниот министер за надворешни работи и помошник на претседателот на Нагорно-Карабах, Давид Бабајан, како и апсењето на поранешниот заменик-командант на ерменските сили во Нагорно-Карабах, Давит Манукијан, и поранешниот шеф на владата на Нагорно-Карабах, Рубен Варданијан.

Апсењата следуваа откога азербејџанските сили презедоа контрола врз енклава на нејзина територија населена со етнички Ерменци, што предизвика егзодус на повеќе од 100.000 Ерменци.

Претседателот на Европскиот совет, Шарл Мишел, изјави дека Украина може да ѝ се приклучи на Европската Унија во 2030 година доколку двете страни си ја завршат домашната задача.

„Украина и другите земји кандидати мора да спроведат реформи, да се борат против корупцијата и да ги исполнат законските барања. Нам во ЕУ треба да ни биде јасно што сакаме да постигнеме заедно, кои се нашите приоритети и на што сакаме да ги трошиме парите. И ние мора да ги забрзаме нашите процеси на одлучување“, изјави Мишел во интервју за германски „Шпигел“.

Тој предупреди дека земјите од Западен Балкан 20 години чекаат да влезат во ЕУ поради што таму расте влијанието на Русија и Кина. Просперитетна и безбедна Украина е во интерес на Европа, додаде тој.

„Нивниот неодамнешен отпор кон Русија покажа дека Украина ѝ припаѓа на ЕУ. Ова би докажувало дека ЕУ е способна за геополитичко дејствување“, рече Мишел.

На забелешката на еден новинар на германски неделник дека САД досега обезбедиле повеќе воена помош за Украина отколку сите земји на ЕУ заедно, Мишел рече дека „ова не е натпревар“. Тој додаде дека геополитичкото влијание не се мери секогаш само со воена моќ.

„Во Обединетите нации ја позиционираме ЕУ како пионер во одбраната на мултилатералниот светски поредок заснован на правила. Ако ние не ја преземеме оваа улога, другите ќе изградат нов поредок – без нашите вредности и правила. Ако тоа се случи, би можеле да изгубиме сè“, изјави Мишел.

Тој рече и дека има итна потреба да се преговара за миграцијата со земји надвор од ЕУ и дека оваа тема ќе биде на дневен ред на неформалниот самит во Гранада.