Поради можноста во Словенија да има поголем број на случаи на т.н. англиски вид коронавирус, словенечката влада ќе ги преиспита одлуките за олеснување на мерките следната недела, објави словенечкиот премиер Јанез Јанша на вонредна прес-конференција.

Јанша рече дека првиот случај на инфекција со англискиот вид е потврден кај косовски државјанин кој престојува во Словенија, а кој се вратил од Белгија.

Словенечкиот премиер кажа дека веќе започнало преиспитување на стотици луѓе со позитивен тест за коронавирус во сите словенечки региони, со цел да се утврди дали станува збор за англискиот вид.

„Некои наоди беа позитивни“, рече Јанша, но ги негираше извештаите во некои медиуми дека веќе биле потврдени десетина вакви случаи.

„Податоците за состојбата со епидемијата од последните три дена не влеваат оптимизам“, рече Јанша, додавајќи дека состојбата со бројот на новоинфицирани во неколку региони е влошена.

Италија ќе преземе законски мерки против компаниите „Фајзер“ и „АстраЗенека“ поради доцнење во испораката на вакцините, предупреди министерот за надворешни работи, Луиџи ди Мајо.

Тој вели дека Италија ќе преземе вакви чекори со намера да ја забрза испораката што, според него, е подобро отколку земјата да бара отштета.

„Правиме сè за да не мора да го менуваме планот за вакцинација. Ги активиравме сите канали за Европската комисија да може да стори сé за да ги принуди овие господа да ги почитуваат нивните договорни обврски“, изјави Ди Мајо за РАИ.

Тој оцени дека доцнењето во испораката на вакцините од страна на „Фајзер“ и „АстраЗенека“ претставува сериозно кршење на договорите.

Германија ќе стане првата земја-членка на ЕУ што ќе започне да користи експериментален третман со антитела, кој му помогна на поранешниот американски претседател Доналд Трамп да оздраве од Ковид-19, изјави министерот за здравство Јенс Шпан.

„Владата купи 200.000 дози за 400 милиони евра“, изјави Шпан за германскиот весник „Билд ам Зонтаг“.

Таканаречените моноклонални коктели со антитела ќе бидат распоредени во универзитетските болници следната недела, рече тој, додавајќи дека Германија е првата земја во ЕУ што ќе ги користи во борбата против пандемијата, објави британскиот весник „Гардијан“.

Шпан не откри кој е производителот што ќе ги доставува лековите, но потврди дека станува збор за истиот лек што го добил поранешниот американски претседател Трамп.

„Тие дејствуваат како пасивна вакцина. Овие антитела може да им помогнат на пациентите со висок ризик да избегнат посериозна прогресија на болеста“, рече Шпан.