Франција ќе ја прекине воената соработка со Нигер и ќе ги повлече своите 1.500 војници од таа африканска земја до крајот на годината по воениот удар во септември, изјави денеска францускиот претседател, Емануел Макрон.

Одлуката е удар за француските антитерористички операции во регионот Сахел, како и за француското влијание во регионот, но Макрон рече дека „пучистите нема да ја држат Франција како заложник“.

„Франција одлучи да го повлече својот амбасадор и да ја прекине воената соработка со Нигер“, рече Макрон во интервју за француските телевизиски станици TF1 и France 2.

Францускиот претседател додаде дека се’ уште го смета демократски избраниот претседател Мохамед Базум, кој беше затворен од пучистите, за легитимен лидер на земјата и дека го известил за својата одлука.

Специјално обвинителство на Косово вечерва соопшти дека за нападот врз косовската полиција се приведени шест лица кои се осомничени за повеќе кривични дела, а едно од нив е тероризам.

„Станува збор за напад врз уставниот поредок на Косово, подготовка на терористички акти или криминални дејствија против уставниот поредок и безбедноста на Косово, поседување, контрола или неовластено поседување оружје“, соопшти обвинителството.

Исто така, обвинителството објави дека во денешната акција се запленети возила со значително количество оружје.

На приведените им е одреден притвор до 48 часа, соопшти обвинителството, пренесе Коха.

Премиерот Димитар Ковачевски се огласи со коментар по денешните престрелки на северот на Косово апелирајќи на деескалација и осудувајќи ги настаните.

Ковачевски нагласи дека со голема загриженост се следи состојбата во Косово и се во постојана координација со сојузниците. Премиерот изрази целосна поддршка на КФОР за сите идни активности кои, како што вели, се во насока на гарантирање на мирот и стабилноста во Косово и регионот.

Во однос на безбедносната состојба во Македонија, Ковачевски уверува дека граѓаните може да се спокојни – таа е стабилна, без никакви индикации за можни нарушувања.

„Сите институции задолжени за безбедноста будно ја следат состојбата. Воедно согласно информациите споделени помеѓу безбедносно разузнавачките служби во земјата како и информациите добиени од службите на нашите сојузници во НАТО алијансата, не постојат индиции кои укажуваат на нарушување на безбедноста во Северна Македонија“, рече Ковачевски.

Премиерот повика на продолжување на дијалогот и решавање на сите отворени прашања на мирен и демократски начин. Клучно е, вели тој, забрзувањето на евроатлантските интеграции на Западен Балкан, како единствен начин за обезбедување напредок и стабилност во регионот, како и намалување на влијанието на дестабилизирачки трети страни.