Израел планира целосно да ја отвори својата економија до 5 април, откако ќе бидат вакцинирани сите граѓани што ги исполнуваат условите.

Планот е да се отворат фабрики за производство на вакцини од страна на компаниите „Фајзер“ и „Модерна“ во Израел, откри премиерот Бенјамин Нетанјаху денес на конференцијата во Тел Авив.

Досега, Израел ги увезуваше вакцините на „Фајзер“/ „Бионтек“ и „Модерна“, а најмалку 50 проценти од населението во земјата со девет милиони граѓани добија една доза, пренесува „Ројтерс“.

Хрватскиот премиер Андреј Пленковиќ најави дека, поради подобрената епидемиолошка состојба во земјата, некои мерки ќе бидат олабавени.

„Денес сме заедно со Данска, земја со најмала инциденца на земји во ЕУ во однос на нови инфекции. Добро е што е намален бројот на новоинфицирани и хоспитализирани, оние кои се на апарати за дишење, починати, оние во самоизолација“, рече Пленковиќ на владината седница.

Хрватскиот премиер најави отворање на терасите и овозможување работа на отворен простор, но со епидемиолошки мерки.

„Во однос на спортот, ќе се обезбеди обука во затворен простор“, рече тој.

Кинеското Министерство за надворешни работи демантираше дека на американските дипломати им биле земани анални брисови на Ковид-19, откако медиумите објавија дека некои американски дипломати се жалат на оваа постапка, пренесува „Ројтерс“.

„Колку што ми е познато, од американскиот дипломатски персонал стациониран во Кина никогаш не беше баран анален брис за тестот на Ковид-19“, рече портпаролот на кинеското Министерство за надворешни работи Зао Лиџијан на денешната прес-конференција, според агенцијата.

„Ројтерс“ пренесува дека американската медиумска онлајн платформа „Вајс“ го цитирала официјалниот претставник на Стејт департментот во средата дека ваквиот тест бил земен по грешка и дека Кина соопштила дека ќе престане да користи брисови за тестирање американски дипломати.