Камала Харис ги коментираше немирите во Лос Анџелес: Ова не е прашање на јавна безбедност, ова е паника

Протестите во Лос Анџелес против рациите на американската Служба за имиграција и царина (ICE) се претворија во судири на улиците на Лос Анџелес, а американскиот претседател Доналд Трамп одобри распоредување на 2.000 војници од Националната гарда во градот.

Насилството ескалираше во текот на викендот, при што демонстрантите фрлаа камења и молотови коктели, палеа автомобили и се судрија со полицијата на неколку локации низ градот. Полицијата одговори со солзавец и гумени куршуми, а Националната гарда зазеде позиции пред федералните згради и други објекти.

Поранешната потпретседателка на САД и претседателска кандидатка Камала Харис, која потекнува од Калифорнија, ја критикуваше одлуката на Трамп за распоредување трупи, нарекувајќи ја „опасна ескалација“ и дел од „сурова, пресметана агенда“ насочена кон ширење страв и поделба.

My statement on what's unfolding in Los Angeles. pic.twitter.com/rujs8mrVPK

— Kamala Harris (@KamalaHarris) June 8, 2025

„Лос Анџелес е мојот дом. И како многу Американци, сум згрозена од она што го гледаме на улиците на нашиот град. Ова не е прашање на јавна безбедност, ова е паника“, рече Харис во објава на платформата Икс. Таа нагласи дека протестите биле „претежно мирни“ и дека продолжува да ги поддржува милионите Американци кои „се залагаат за основните права и слободи“.

Градоначалничката на Лос Анџелес, Карен Бас, го осуди насилството, велејќи: „Секогаш ќе го штитиме правото на граѓаните мирно да протестираат, но насилството и уништувањето нема да се толерираат. Одговорните ќе бидат изведени пред лицето на правдата“.

Гувернерот на Калифорнија, Гавин Њусом, отиде чекор понатаму и повика на повлекување на Националната гарда од Лос Анџелес: „Ова е сериозно кршење на федералниот суверенитет. Немавме проблем сè додека не се вмеша Трамп“.

Трамп одговори на Truth Social: „Ако гувернерот Гавин Њусом и градоначалничката Карен Бас не можат да си ја работат работата – а сите знаеме дека не можат – федералната влада ќе се справи правилно со немирите и грабежите!“