Најмалку 50 луѓе загинаа, а многу се водат како исчезнати кога брод полн со хинду-верници потона во Бангладеш, соопштија денеска официјални лица.

Несреќата се случила вчера, а меѓу загинатите има 25 жени и 13 деца, изјави Јахурул Ислам, администратор на северната област Панчагарх, каде што се случи несреќата, пренесе „Ројтерс“.

Спасувачката потрага продолжува.

Повеќето од патниците биле хинду-верници, кои отишле во храмот на фестивалот „Махалаја“ кога Хиндусите им принесуваат жртви на своите предци.

На бродот имало повеќе од 70 патници.

Стотици луѓе годишно умираат во несреќи со траект во Бангладеш поради недостиг на безбедносни стандарди.

Финската погранична стража предлага да се огради дел од границата со Русија за да се спречи нелегален влез во земјата, пренесува „Интерфакс“.

„Извештајот на финските граничари укажува дека 10 до 20 отсто од границата долга 1.300 километри треба да биде оградена. Тоа би значело од 130 до 260 километри. Оградата треба да трае 50 години”, пишува финскиот весник „Иле“.

Се проценува дека оградата ќе чини неколку стотици милиони евра.

Шефот на одделот за меѓународна соработка на Граничната стража, Мати Питканити, претходно изјави дека агенцијата веќе почнала со дизајнирање на оградата.

„Тоа нема да биде само ограда, туку ќе има и систем за техничка контрола“, рече тој за време на летната дебата за пристапот на Финска во НАТО.

Турскиот претседател Реџеп Таип Ердоган денеска повтори дека би сакал да организира средба меѓу претседателите на Руската Федерација и Украина, Владимир Путин и Володимир Зеленски.

„Турција е за организирање средба меѓу претседателите на Руската Федерација и Украина“, рече Ердоган, јави агенцијата „Анадолија“.

Тој истакна дека дијалогот на Турција со Русија и Украина напредува и како пример за таквото достигнување го наведе договорот за житниот коридор преку кој од Украина веќе се извезени повеќе од пет милиони тони земјоделски производи, додава „Интерфакс“.