Американскиот претседател, Доналд Трамп, изјави дека САД во последните неколку недели постигнале голем напредок во преговорите со талибанците и јасно даде до знаење дека не му е драго што американските воени сили се присутни во Авганистан, објави Си-ен-ен.

За време средбата со пакистанскиот премиер Имран Кан, Трамп рекол дека 18-годишната војна со Авганистан била повеќе од контролна природа, односно дека воените сили на САД дејствувале како полицајци, а не како војници. Трамп нагласил дека доколку сакаат, САД би можеле бргу да стават крај на таа војна со брутална воена сила, но дека тогаш би загинале 10 милиони луѓе.

„Ако сакам веднаш да победам во војната, Авганистан би бил избришан од лицето на земјата за најмногу десет дена. Но, јас тоа не го сакам, не сакам да одам по тој пат. Ние, всушност, сме како полицајци. Не водиме војна. Да сакавме да војуваме и да го победиме Авганистан, ќе го освоевме за една недела. Но, не сакам да убијам 10 милиони луѓе“, рекол Трамп.

Иран бил и ќе биде чувар на безбедноста и слободната пловидба во Персискиот Залив, Ормутската Теснина и во Оманското Море, порача претседателот на Иран, Хасан Рохани.

Тој тоа го рекол по повод заплената на британскиот танкер од страна на иранската револуционерна гарда.

Велика Британија соопшти дека сака да оформи мисија под европско водство за надзор и заштита на бродовите во тоа подрачје.

„Иран не сака ескалација на актуелните тензии во регионот и со другите земји и никогаш нема да почне војна или некаков конфликт“ рекол Рохани, пренесе италијанската агенција АНСА.

Рохани повика на дијалог и на регионална соработка.

Заменик-премиерот и лидер на десничарската Лига во Италија, Матео Салвини, на „Твитер“ му посака на новиот британски премиер Борис Џонсон сè најдобро на новата функција.

Тој изјави дека има сè поголеми симпатии кон новиот лидер на британските конзервативци и иден премиер.

Салвини изјави дека уште повеќе го цени Џонсон откако поранешниот британски премиер Тони Блер изјави дека тој ќе биде поопасен од неговата Лига.