Сто и десетте пратеници избрани на парламентарните избори во Белорусија се од партии кои ја поддржуваат власта, а опозицијата ги загуби и досегашните две места.

На претходните избори во 2016 година, двајца членови на опозицијата беа избрани како претставници во парламентот за прв пат во 20 години, но ни на еден од нив не му било дозволено да се кандидира овој пат. Бројни кандидати, вклучително и некои од опозициските фаворити, беа исклучени од изборите затоа што, наводно, не успеале да ги исполнат административните барања.

Политикологот Павел Усов го смета за претеран податокот дека одѕивот на изборите бил 77,22 проценти, кој го објави државната изборна комисија, и додадва дека граѓаните се помалку излегуваат на избори, чиј исход е познат однапред.

Независниот информативен сајт naviny.by оцени дека „власта плукнала на опозицијата“ и си формирала парламент по свој терк.

Ваквиот резултат дојде и покрај напорите на шефот на државата, Александар Лукашенко, кој се обидува да се приближи кон Европската унија иако таа редовно го критикува недостатокот на демократија во поранешната советска република. Во последните години Лукашенко и дава повеќе простор на опозицијата и ги ослободи политичките затвореници во обид да ги подобри врските со Западот, по несогласувањата со својот традиционален сојузник Москва.

Наречен „последниот диктатор во Европа“, Лукашенко ја води поранешната советска република цели 25 години.

Ниту едни избори кои од тогаш се одржуваат во Белорусија не се сметаат за слободни или фер од страна на меѓународните набудувачи.

Кремљ потврди дека рускиот претседател Владимир Путин на 9 декември ќе учествува на меѓународниот самит на Нормандиската четворка во Париз за ситуацијата во Украина.

Портпаролот на Кремљ, Дмитриј Песков, им рече на новинарите дека Путин ќе присуствува на Самитот во обид да се постигне напредок во барање мирно решавање на конфликтот во источна Украина.

Песков одби да разговара за очекувањата на Москва за настанот, пренесува „Ројтерс“.

Француското претседателство објави во петокот дека во Париз ќе бидат лидерите на Франција, Германија, Русија и Украина, но Кремљ дури денес јавно го потврди присуството на претседателот Путин.

Северна Кореја одговори на твитот од американскиот претседател Доналд Трамп, во кој тој најави нова средба со лидерот на Северна Кореја, Ким Џонг-ун, велејќи дека Пјонгјанг нема интерес да му овозможи на Трамп состанок со кој ќе се фали, доколку не добие нешто од суштинско значење.

Советникот во Министерството за надворешни работи на Северна Кореја, Ким Ки-Гуан, во изјавата рече дека Вашингтон мора да се откаже од она што Пјонгјанг го смета за „непријателска политика“, доколку сака преговорите и натаму да продолжат.

Според АП, соопштението е последен повик на Пјонгјанг до Вашингтон да направи отстапки пред крајот на рокот утврден од администрацијата на Трамп и да понуди заемно прифатливи услови за продолжување на нуклеарните разговори.

Вчера Трамп, реагирајќи на навредите на Северна Кореја на сметка на неговиот политички ривал Џо Бајден, напиша во порака до Ким на „Твитер“ дека тој „не е бесно куче“ и дека е „нешто подобар од тоа“ и ја заврши пораката со зборовите „Се гледаме наскоро“.