Руската нафтена компанија Роснефт соопшти дека поранешниот германски канцелар Герхард Шредер рекол дека повеќе не може да биде дел од нејзиниот одбор.

Истото го направи и бизнисменот Матијас Варниг.

Овој потег уследи откако Европскиот парламент побара Шредер да биде на списокот со санкции доколку не поднесе оставка од Роснефт, објавија Гардијан, Фајненшл пост и Фајнанс Јаху.

Во соопштението на компанијата се вели дека жалат за одлуката на Шредер и Варниг и им се заблагодаруваат за „континуираната поддршка“.

Командантот на украинскиот полк од Азов, Денис Прокопенко, се обрати до јавноста и рече дека во Азов добиле наредба да престанат да го бранат Мариупол и да ги спасат животите на борците, пренесуваат агенциите.

Според него, сите цивили од Азовстал биле евакуирани, а на тешко ранетите војници им била укажана медицинска помош.

Изјавил дека тие мора да бидат однесени во област под украинска контрола.

Во тек е отстранувањето на телата на загинатите бранители на Мариупол, додал Прокопенко.

Русија ќе формира 12 нови воени бази на западот од земјата како одговор на зајакнувањето на НАТО и очекуваното проширување на алијансата во Финска и Шведска, изјави денеска рускиот министер за одбрана Сергеј Шојгу.

„До крајот на годината, 12 воени бази и единици ќе бидат распоредени во Западниот воен округ“, изјави Шојгу на претставниците на одбраната и армијата.

Тој предупреди на „зголемување на воените закани на границите на Русија“, обвинувајќи ги НАТО и САД, пренесоа руските агенции.