Американскиот претседател Доналд Трамп ги смета лажните вести за одговорни за нападите што се случија овој викенд во Охајо и Тексас во кои беа убиени 47 луѓе.

„Медиумите имаат голема одговорност кон животот и безбедноста во нашата земја. Лажните вести придонесoа многу за гневот и бесот што се создаваат во текот на годините. Известувањето мора да почне да биде фер, избалансирано и непристрасно или овие ужасни проблеми само ќе се влошат“, напиша Трамп на „Твитер“.

Во нападот во државата Дејтон, во Охајо, напаѓачот, кој беше идентификуван како Конор Бетс (24), уби деветмина и рани 26 луѓе. Меѓу убиените е неговата сестра Меган Бетс.

Пукањето во Охајо се случи само неколку часа по смртоносниот напад во Тексас, каде што беа убиени 20, а ранети 26 лица.

Европските влади одлучија Бугарката Кристалина Георгиева, извршна директорка на Светската банка, да биде нивниот кандидат за нов директор на Меѓународниот монетарен фонд (ММФ) со седиште во Вашингтон, на местото на Французинката Кристин Лагард.

Освен Георгиева, во игра бил и поранешниот холандски министер за финансии, Јерен Дијселблем.

По долгогодишниот неформален аранжман, Европа традиционално кандидира шеф на ММФ, додека американскиот кандидат станува претседател на Светската банка.

Извршниот одбор на ММФ мора да избере замена за Лагард, која е назначена за шефица на Европската централна банка, а нејзината оставка ќе стапи на сила на 12 септември.

ММФ е клучна меѓународна финансиска институција која обезбедува економски совети и финансиска помош за нејзините 189 земји-членки.

Топлотниот бран кој оваа недела го зафати Израел во средата го достигна врвот во Содом, кај Мртвото Море, кога биле измерени 49,9 Целзиусови степени.

„Тоа е највисока температура што некогаш е измерена од основањето на државата во 1948 година и втора највисока некогаш забележана во тоа подрачје откако е почнато бележење на временските услови во 20-тите години“, соопшти Израелската метеорлошка служба.

Највисоката температура била измерена во 1942 година – 54 степени во комуната Тирта Цви на северот на Долината Јордан.

„Иако екстремни температури биле измерени и во неодамнешното минато, новиот рекорд покажува дека глобалните климатски промени и затоплувањето влијаеле на просечните температури“, објави Метеролошката служба.

Од таму навеле дека се очекува затоплувањето да продолжи и дека ќе има екстремни топлотни бранови и нови рекордни високи температури.

Екстремно топло време по должината на брегот на Средоземното Море е ретко и се случува еднаш во пет до десет години, но во последната деценија станува сè почесто на секои две-три години.