Во Грција денеска е потврден 121 нов случај на коронавирус, што е најголем дневен број на нови случаи од 22 април.

Од 121 нов случај, пет се регистрирани на копнените и воздушните влезни точки во земјата, додека 26 се регистрирани во регионот на Атика, а 47 во Солун, пренесе агенцијата АНА.

Вкупниот број на заболени од коронавирус во Грција е 4.885, а бројот на починати е 209.

Во Црна Гора се пријавени 60 нови случаи на коронавирус, а едно лице починало, соопшти тамошниот Институт за јавно здравје.

Во последните 24 часа тестирани се 465 лица, а најголем број од заболените се од Подгорица, Бијело Поле и Никшиќ.

Од почетокот на епидемијата во Црна Гора се потврдени 3.361 случај, а починале 53 лица, од кои 44 од почетокот на јуни.

Земјотрес со интензитет од 5,7 степени според Рихтеровата скала ја потресе провинцијата Малати во југоисточниот дел на Турција, соопшти Институтот за истражување земјотреси.

Потресот бил на длабочина од пет километри, пренесе „Ројтерс“.

Според информациите, земјотресот предизвикал неколку материјални штети, но нема извештај за евентуални жртви или повредени.

Турскиот Директорат за вонредни состојби навел дека земјотресот бил со магнитуда од 5,2 степени.