Американскиот претседател, Доналд Трамп, го одложи објавувањето на низа документи поврзани со почетокот на истрагата на ФБИ за наводното руско мешање во американските избори.

Објавувањето е одложено бидејќи правосудните органи го замолиле Трамп претходно тие да ги разгледаат документите.

Трамп вечерва во низа пораки на „Твитер“ изрази надеж дека тоа ќе биде брзо завршено и дека документите набргу ќе бидат достапни за јавноста.

Официјални лица од Министерството за правда наведоа дека објавувањето на документите може да има негативни влијанија.

Трамп пред два дена ја отстрани ознаката за тајност на низа документи поврзани со почетокот на истрагата на ФБИ за наводно руско мешање во изборите во САД вклучувајќи дел од налогот за таен надзор и пораките на некогашниот шеф на ФБИ, Џејмс Коми.

Претседателите на Србија и Русија, Александар Вучиќ и Владимир Путин, ќе се сретнат на 2 октомври во Москва, објави рускиот амбасадор во Белград, Александар Чепурин, пренесе „Танјуг“.

На средбата се очекува да бидат разгледани клучните билатерални и регионални прашања, а рускиот амбасадор оценува дека расположението е позитивно.

Претходно, Вучиќ преку социјалната мрежа „Твитер“ го пофали Чепурин за искрената заложба за градење на што е можно подобри односи помеѓу Русија и Србија.

Три бебиња и две возрасни лица се избодени со нож во приватна градинка во Њујорк, соопшти полицијата и додаде дека повредените се префрлени во болница.

Властите ја уапсија негувателката, која се сомничи за нападот во градинката, каде што во моментот престојувале девет бебиња.

Жената била пронајдена во подрум во зградата додека се обидувала да изврши самоубиство.

Полицијата истражува дали градинката е регистрирана или жената ги чувала децата во својот стан илегално. Покрај бебињата, со нож избодени се две возрасни лица, татко на едно од бебињата и уште една жена што помагала при чувањето на децата.