Поради бавниот напредок на вакцинацијата против Ковид-19, со оглед дека има недостиг на вакцини, француските и германските власти се обидуваат да ги уверат граѓаните дека вакцината на „Астразенека“ е исто толку безбедна како и другите.

Залихите на вакцини на британско-шведската компанија се неискористени во двете земји, што ја забавува борбата против пандемијата.

Во Франција биле употребени само 273.000 дози од вакцината на „Астразенека“, од 1,7 милиони примени до крајот на февруари, според Министерството за здравство.

Двете земји не ја одобрија вакцината за лица постари од 65 години, предизвикувајќи сомнеж за нејзината ефикасност во однос на ефикасноста на вакцините произведени од „Фајзер/Бионтек“ и „Модерна“.

Францускиот министер за здравство Оливие Веран, кој и самиот е лекар, беше вакциниран со вакцината во живо на телевизија за да ги увери граѓаните во нејзината ефикасност и безбедност.

Во Германија се повикуваат да се олеснат приоритетните списоци за вакцинација за да не пропаднат вакцините на „Астразенека“. До 23 февруари, 1,45 милиони дози на вакцината биле доставени во Германија, а искористени биле само 240.000.

Германската канцеларка Ангела Меркел задутре ќе се сретне со лидерите на 16 региони за да разговара за следните чекори во борбата против пандемијата. Во едно интервју минатата недела, Меркел ја пофали вакцината на „Астразенека“ како „доверлива вакцина“, повикувајќи ги Германците да не бидат пребирливи.

Но, таа нема да биде вакцинирана со таа вакцина, бидејќи има 66 години.

Германската комисија за вакцини – СТИКО, наскоро ќе објави нова препорака за вакцината, откако истражувањето покажа дека е ефикасна за старите лица, рече во петокот претседателот на комисијата, Томас Мертенс.

Според меѓународното право, Русија е одговорна за труењето на рускиот опозициски лидер Алексеј Навални, наведуваат во прелиминарните наоди експертите за човекови права во Обединетите нации.

„Нашиот заклучок е дека Русија е одговорна за обидот да се отруе Навални“, рече на брифингот Ања Каламар, специјалниот известувач на ООН за егзекуции по скратена постапка.

Со оглед на несоодветниот одговор на домашните власти, употребата на забрането хемиско оружје и очигледна шема на насочени обиди за атентат, сметаме дека треба итно да се спроведе меѓународна истрага за да се утврдат фактите и да се разјаснат сите околности поврзани со труењето на Навални, додаде експертот на ООН.

Исламистички екстремисти во возила, вооружени со митралези, убија девет цивили во нападите врз три села во центарот на Мали, соопштија локалните власти.

Две групи напаѓачи ги нападнаа етничките села Догона – Гореј, Симиканда и Џaмнати во регионот Мопти, кои беа разурнувани од исламисти и меѓуетничко насилство во последниве години, соопштија властите.

Мулај Гвиндо, градоначалник на Банкас, лоциран во близина на Гореј и Симиканд, ги обвини нападите врз истите екстремисти, во кои беа убиени осум лица при напади врз воената пошта и базата на жандармеријата минатиот четврток.