Претседателот на Србија, Александар Вучиќ, изјави дека одлуката дали ќе биде кандидат за премиер треба да биде негова, како и одлука на народот кој, како што нагласи, сака промени што гарантираат стабилност и сигурност, а не хаос и промени какви што, според него, наметнуваат блокадерите.

Вучиќ ги замоли сопартијците да не зборуваат за тоа дали тој ќе биде кандидат за премиер на претстојните избори и да не шпекулираат на таа тема.

„Не е ни време ни место. Прво, тоа мора да биде моја одлука – дали се чувствувам доволно способен и дали го сакам тоа, а потоа мора да биде одлука на народот. А народот сака промени, само не сака промени какви што му наметнуваат блокадерите, туку промени што гарантираат стабилност и сигурност, а не хаос“, изјави Вучиќ во Претседателството на Србија, одговарајќи на новинарско прашање дали ќе се знае дали тој ќе биде кандидат за премиер на парламентарните избори.

Вучиќ рече дека е тешко да не се посака промена на некој што, како што наведе, е 14 години на власт, и дека тука не мисли само на политичките неистомисленици, туку и на оние што го поддржуваат.

„Мене ми останува само да кажам колку грешев и колку работи пропуштив да направам. Секој ден се каам што понекогаш сум се опуштил и можеби не сум работел онолку колку што требаше за да постигнеме уште подобри резултати“, рече Вучиќ, пренесе „Телеграф“.

Тој оцени дека на следните избори ќе победи оној што ќе ги убеди граѓаните дека е способен истовремено да донесе и стабилност и промени.

„Што се однесува до премиерот, ги молам сите луѓе да не зборуваат за тоа. Едноставно е, во овој момент не сакам да кажам не, затоа што секогаш оставам некаква можност“, изјави Вучиќ.

Тој наведе дека има илјада забелешки на сопствена сметка, но дека се постигнати резултати кои денес се земаат здраво за готово и повеќе не се ценат затоа што луѓето се навикнале на нив.

Истакна дека за првпат во историјата Србија има стабилен курс на динарот, а дека поранешниот гувернер на Народната банка на Србија, Дејан Шошкиќ, кој се споменува како име на студентско-блокадерската листа, го уништил динарот и му ја намалил вредноста за 50 отсто.

Вучиќ додаде дека денес Србија има и најниска стапка на јавен долг во однос на бруто-домашниот производ во модерната историја.

Шефот за комуникации на премиерот Кир Стармер, Тим Алан, денес поднесе оставка, велејќи дека тоа го отвора патот за нов тим кој ќе го поддржи британскиот лидер, кој е критикуван поради неговата одлука да го назначи Питер Манделсон за амбасадор во Соединетите Американски Држави.

Заминувањето на Алан доаѓа само еден ден откако најблискиот помошник на Стармер, Морган МекСвини, поднесе оставка од функцијата шеф на кабинетот, велејќи дека ја презема одговорноста да му препорача на премиерот да го назначи Манделсон, чии блиски врски со покојниот сексуален престапник Џефри Епстин ја доведоа во прашање проценката и способноста на Стармер да владее, пишуваат медиумите.

Стармер им се обрати на вработените во неговата канцеларија на Даунинг стрит, повикувајќи ги да останат обединети. „Мора да докажеме дека политиката може да биде силата на доброто“, им рече тој.

„Верувам дека може. Верувам дека е. Ајде да продолжиме понатаму. Ајде да продолжиме со доверба додека продолжуваме да ја менуваме земјата.“

Британскиот премиер продолжува со својата работа и нема намера да се повлече, изјави неговиот портпарол кога беше прашан дали Стармер има намера да поднесе оставка поради случајот Манделсон.

Лидерот на опозициската Конзервативна партија, Кеми Баденох, го обвини Стармер дека е неспособен да ја води својата влада.

„Тој е како пластична кеса што се разнесува на ветерот. Треба да се собере и ако не може да го направи тоа, тогаш некој друг во Лабуристичката партија треба да го стори тоа или треба да имаме избори“, изјави Баденох за „Скај њуз“.

Шефицата на дипломатијата на ЕУ, Каја Калас, изјави дека Кремљ не ги сфаќа сериозно преговорите за Украина и дека Брисел размислува за назначување специјален претставник кој би ги претставувал 27-те членки на Унијата на преговарачката маса.

Во интервју за порталот „Јуроњуз“ Калас предупреди дека мировните напори околу Украина ризикуваат зајакнување на руската агресија доколку Москва не биде принудена да направи вистински отстапки.

Таа ги изрази своите стравувања за преговорите меѓу Русија и Украина, кои беа посредувани од САД и кои досега не дадоа резултати. Таа оцени дека застојот во преговорите покажува недостаток на сериозност на Кремљ, бидејќи Украина е под притисок да се согласи на отстапки.

„Тие (руските преговарачи) навистина немаат сериозни луѓе на масата“, рече Калас, додавајќи дека од оваа рунда преговори не се очекува ништо.

Високата претставничка за надворешна политика призна дека за прв пат од почетокот на големата инвазија на Украина, администрацијата на Трамп ги донесе двете страни на преговарачка маса, но таа истакна дека постои очигледна нерамнотежа помеѓу она што се бара од Киев и она што се бара од Москва.

„Видовме само каде Украинците се подготвени да направат отстапки за да се стави крај на војната. Не видовме никакви отстапки од руската страна“, изјави Калас за „Јуроњуз“.

Калас рече дека болните отстапки, главно во врска со територијата, се наменети само за Украинците. Таа истакна дека на Украинците е да одлучат за какви отстапки се подготвени и предупреди против руските преговарачки тактики.

Додаде дека Русите бараат максимум, нешто што никогаш не било нивно, дека тие упатуваат закани и ултиматуми, користат сила.

Во меѓувреме, се повеќе има повици ЕУ да назначи специјален пратеник кој ќе го претставува блокот и ќе ја поддржува Украина во преговорите.

Калас не сакаше да шпекулира со имиња за таа позиција, но истакна дека фокусот треба да биде на мандатот и целта на назначувањето на претставникот.

„Поентата во моментов не е за личноста, туку за тоа што и колку сакаме да добиеме со тоа назначување“, изјави шефицата на дипломатијата на ЕУ за „Јуроњуз“. „Ако Русите мислат дека постигнуваат максимални цели со Американците, зошто би разговарале со Европејците“, праша таа.

Наместо тоа, Калас верува дека Русија мора да се стави во позиција каде што „транзитира од преправање дека преговара кон вистинско преговарање“, што би барало сила и единство на Западот.