Црногорската полиција во Тиват уапси двајца државјани на Хрватска врз основа на налог од Интерпол, издаден од португалската полиција.

Хрватите на возраст од 46 и 53 години се осомничени за шверц на повеќе од еден тон кокаин, односно се барани за кривична постапка под сомнение за трговија со дрога, пренесе порталот „Индекс“.

„Според сомнежите, на 23 јуни минатата година, тие двајца од Карибите до Португалија транспортирале кокаин скриен во внатрешност на брод. Португалската полиција тогаш пронашла и запленила вкупно 1.200 килограми кокаин“, се вели во соопштението на црногорските надлежни органи.

Акцијата за апсење била спроведена во соработка меѓу службите на Португалија и Хрватска, а била реализирана од припадници од секторот за организиран криминал и корупција на црногорската полиција.

САД издадоа визи за иранскиот претседател и министерот за надворешни работи, Хасан Рохани и Џавад Зариф, така што тие ќе опатуваат во Њујорк за годишното Генерално собрание на Обединетите нации, соопшти иранската мисија во ОН.

Портпаролот на иранската мисија, Алиреза Мирјусефи, за „Ројтерс“ потврдил дека визите се издадени.

Зариф претходно денеска изјави дека американскиот државен секретар, Мајк Помпео, се обидува да го одложи издавањето на визи за иранската делегација.

Бремената Карен Тарнер (31) до смрт била избодена од непознати лица додека заедно со синот и сопругот спиела во луксузно одморалиште во Јужна Африка, пренесе „Скај њуз“.

Тарнер била убиена во вторникот околу 3 часот по полноќ по локално време, еден ден откако го прославила својот 31. роденден. Напаѓачите го прободеле и нејзиниот сопруг Метју (33), но тој го преживеал нападот.

Двајца мажи вооружени со ножеви провалиле во апартманот со поглед на плажа, лоциран во природниот резерват Хлулека.

Карен Тарнер, учителка од градот Андерберг, починала набргу по нападот, кој не го преживеало ниту нероденото бебе.

Метју Тарнер го преживеал нападот и бил пренесен во најблискиот поголем град каде бил подложен на операција. Синот кој спиел во нивниот кревет не е повреден.

Портпаролката на локалната полицијата рекла дека нема знаци на насилно влегување во објектот, но дека сè во апартманот било расфрлано и превртено наопаку.

„Не се работи за грабеж затоа што не се одземени никакви скапоцености“, додала таа.

Мотивот за нападот сè уште не е познат, но полицијата соопшти дека идентификувала еден од осомничените.

Семејството Тарнер престојувало во луксузното одморалиште за да го прослави роденденот на Карен. Двојката била во брак од 2017 година, а поседуваат и семејна фарма во јужноафриканскиот Андерберг.