Свет
Мајка и ќерка обвинети за убиство на петмина роднини во Пенсилванија
Мајка и ќерка се обвинети за убиство на петмина родинини со кои живееле во ист стан во Пенсилванија, САД. Од морничавиот настан се спасил само осмиот станар во куќата на стравот, 17-годишното момче Џошуа, кој престојувал кај пријатели.
Случајот бил откриен кога социјален работник дошол да го посети семејството. Тој тропал на вратата, но кога никој не му отворил, влегле внатре со полициска асистенција. Надлежните биле шокирани од глетката. Целиот стан бил во неред, скршено стакло имало насекаде, мебелот бил превртен, а во спалната соба биле пронајдени пет мртви тела. Една жена и тинејџерка биле пронајдени на креветот, сè уште биле живи, но дезориентирани. Тие имале повреди на вратот и веднаш биле пренесени во болница.
Иако првично тврделе дека непознати лица влегле во станот и го извршиле убиството, подоцна ја смениле својата изјава. Сепак, полицијата утврдила дека мајката Шана Декри (45) и нејзината ќерка Доминик (19), најверојатно, ги убиле своите петмина роднини со кои заедно живееле. Тие се обвинети за кривично дело убиство и едно обвинение за заговор за смртта на своите роднини.
Шана пред полицијата тврдела дека сите во станот зборувале за самоубиство и дека сакале да умрат. Мајката е обвинета за смртта на своите деца Налрах (25) и Дејмон (13). Таа заедно со ќерка си е обвинета и за смртта на својата сестра Џамила Кембел (42) и на нејзините ќерки близначки Ерика и Имани Ален (9).
Полицијата сè уште ги истражува причините за убиствата. Нема други осомничени за настанот. Мајката и ќерката се наоѓаат во казнено-поправен дом.
Осмиот член на семејството, кој живеел во станот, синот на Џамила Кембел, не бил пронајден веднаш, но подоцна полицијата го лоцирала кај пријатели во Њу Џерси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Девојка која исчезна во март во Србија е пронајдена
Тијана Симиќ, која била пријавена за исчезната на 13 март оваа година, и последен пат била видена на Карабурма во Белград, е пронајдена повеќе од еден месец од нејзиното исчезнување.
Засега не се познати детали, а среќните вести ги објави нејзината сестра на „Твитер“.
„Тијана ја пронајдовме, ви благодарам на сите за помошта“, напиша таа.
Tijanu smo pronašli, hvala puno svima na pomoći ♥️
— fifo (@sofoklee) April 24, 2024
Семејството на Тијана молеше за помош или било каква информација за неа, и после повеќе од еден месец е пронајдена.
Свет
Наставниците во Тенеси ќе можат да носат пиштоли на училиште
Пратениците во американската сојузна држава Тенеси усвоија закон со кој на наставниците во државата ќе им се овозможи да носат скриени пиштоли на училиште. Нацрт-законот беше одобрен со 68-28 гласови во Претставничкиот дом на Тенеси, во кој доминираат републиканците. Државниот Сенат го усвои законот претходно овој месец.
Тенеси има жестока дебата за законите за оружје по минатогодишното пукање во училиште во Нешвил во кое загинаа три деца и тројца возрасни членови на персоналот. Некои од демократите во Претставничкиот дом помогнаа во водењето на протестите во главниот град, што доведе до нивно кратко протерување од законодавниот дом минатата година.
„Ова е ужасен ден за Тенеси, нашите деца, нашите наставници и нашите заедници“, напиша на социјалните мрежи Џастин Пирсон, демократ кој беше исфрлен од Домот минатата година, а потоа беше реизбран. „Наместо да ги заштитат децата, тие пак ги заштитија пиштолите!“
Републиканците и другите конзервативци честопати повикуваат на вооружување на наставниците како одговор на бројните престрелки во училиштата што се случија во САД во последните 25 години. Поддржувачите на овие мерки тврдат дека вооружените наставници ќе ги одвратат потенцијалните пукања во училиштата.
Противниците велат дека оружјето во училиштата веројатно ќе доведе само до трагични случајни престрелки.
Околу половина од сите американски држави им дозволуваат на наставниците или другите вработени во училиштата да носат огнено оружје на училишни терени, според Правниот центар Гифордс, група за безбедност на оружје. Според законот на Тенеси, секое лице кое сака да носи скриен пиштол на училиште мора да заврши најмалку 40 часа полициска обука. Трошоците за обуката заедно со огненото оружје се на товар на поединецот.
Според предлог-законот, идентитетот на наставникот или член на персоналот кој носи оружје нема да биде јавен. Директорите на училиштата мора да дадат одобрение за лице да носи оружје, а началниците на локалната полиција мора да бидат информирани за идентитетот на носителот.
Регион
Во БиХ уапсени 14 криумчари, превезувале мигранти во Хрватска, заработиле 3 милиони евра
Припадниците на Граничната полиција на Босна и Херцеговина уапсија 14 лица под сомнение дека организирале мрежа на криумчари на илегални мигранти преку границата со Хрватска. Акцијата под кодното име „Пирамида“ координирана од Обвинителството на БиХ беше спроведена на 16 различни локации низ земјата.
Како што беше утврдено во досегашната истрага, уапсените организирале илегално преминување на границата на најмалку 600 лица, од кои стотина се деца.
„Според прелиминарните податоци, оваа меѓународна организирана криминална група во изминатите шест месеци остварила финансиска корист од повеќе од шест милиони конвертибилни марки (три милиони евра)“, се вели во полициското соопштение.
Разбивањето на оваа мрежа на трговци со луѓе беше спроведено заедно со Управата за криминалистичка полиција на МВР на Република Хрватска и Европол и со учество на припадници на Агенцијата за разузнавање и безбедност на Босна и Херцеговина (ОСА).
Граничната полиција на БиХ наведува дека продолжува да презема мерки за спречување на шверцот на луѓе, особено против организираните криминални групи. Потсетуваат дека во првите три месеци од годинава полициски службеници и граничари до обвинителството поднеле 83 пријави против 177 лица поради постоење основи на сомнение дека сториле 110 кривични дела криумчарење луѓе.